مصر کی تاریخ کا بد ترین دہشتگرد حملہ، شہادتیں305 تک پہنچ گئیں

قاہرہ: مصری تاریخ میں ہونے والے بدترین دہشت گرد حملے میں شہادتوں کی تعداد 305 تک پہنچ گئی ہے۔

مصر کے صوبے سیناء کے دارالخلافہ العریش کے علاقے بیر العبد کی الروضہ مسجد میں گزشتہ روز نماز جمعہ کے دوران ہونے والے بم دھماکے اور فائرنگ میں اب تک 305 افراد شہید ہوچکے ہیں جن میں 27 بچے بھی شامل ہیں۔

واقعے میں 120 سے زائد افراد زخمی ہوئے ہیں جب کہ حملے کے بعد مصری حکومت نے ملک بھر میں تین روزہ سوگ کا اعلان کرتے ہوئے ہنگامی حالت نافذ کردی تھی۔

مصر: مسجد میں دھماکے اور فائرنگ سے 235 سے زائد نمازی شہید

العریش کے علاقے میں مسجد پر ہونے والے حملے کے دوران 109 افراد زخمی بھی ہوئے، حکومت کا 3 روزہ سوگ کا اعلان

مصری پراسیکیوٹر کے مطابق حملے میں 30 دہشت گرد ملوث تھے جنہوں نے داعش کے جھنڈے اٹھائے ہوئے تھے اور حملہ آوروں نے چہرے پر ماسک اور فوجی لباس بھی پہنے ہوئے تھے۔

مصری تاریخ کے اس بدترین حملے کے فوری بعد فضائیہ نے دہشت گردوں کے ٹھکانوں پر بمباری کی جس میں متعدد دہشت گردوں کے مارے جانے کی اطلاعات ہیں تاہم آزاد ذرائع سے اس کی تصدیق نہیں ہوسکی ہے۔