زینب قتل کیس: مجرم عمران کی سزا کیخلاف اپیل سماعت کیلئے منظور

لاہور: ہائیکورٹ نے زینب قتل کیس کے مجرم عمران کی سزا کے خلاف اپیل سماعت کے لیے منظور کرلی۔

لاہور کی انسداد دہشت گردی کی خصوصی عدالت نے 17 فروری کو زینب قتل کیس کے مرکزی ملزم عمران کو 4 مرتبہ سزائے موت سنائی تھی جس کے خلاف اس نے اپیل لاہور ہائیکورٹ میں دائر کی۔

زینب زیادتی و قتل کیس: مجرم عمران کو 4 بار سزائے موت کا حکم

مجرم کو بچی سے بدفعلی پر عمرقید اور 10 لاکھ روپے جرمانہ جبکہ لاش کو گندگی کے ڈھیر پر پھینکنے پر 7 سال قید اور 10 لاکھ جرمانے کی سزا بھی سنائی گئی۔

جیونیوز کے مطابق لاہور ہائیکورٹ کے جسٹس صداقت علی خان اور جسٹس شہرام سرور چوہدری پر مشتمل دو رکنی بینچ نے  مجرم عمران علی کی سزا کے خلاف اپیل سنی جو سماعت کے لیے منظور کرلی گئی۔

مجرم عمران کی جانب سے اپیل میں کہا گیا ہےکہ انسداد دہشت گردی عدالت نے مکمل دفاع کا موقع نہیں دیا لہٰذا دی گئی سزا غیرقانونی قرار دی جائے۔

لاہور ہائیکورٹ نے کیس کا ریکارڈ آئندہ منگل کو طلب کرلیا ہے۔

ڈی این اے ٹیسٹ کی مدد سے زینب کا قاتل گرفتار

1150 افراد کے ڈی این اے ٹیسٹ کے بعد محمد عمران کو گرفتار کیا گیا، ملزم سیریل کلر ہے اور قصور میں زیادتی کے 7 دیگر واقعات میں بھی ملوث ہے، وزیراعلیٰ پنجاب

واضح رہے کہ پنجاب کے ضلع قصور سے اغواء کی جانے والی 7 سالہ بچی زینب کو زیادتی کے بعد قتل کردیا گیا تھا جس کی لاش 9 جنوری کو ایک کچرا کنڈی سے ملی تھی۔

پولیس نے 14 روز کی تگ و دو کے بعد گزشتہ روز ملزم عمران کو گرفتار کیا جو قصور میں دیگر 8 بچیوں کے قتل میں بھی ملوث نکلا۔