چیئرمین سینیٹ صادق سنجرانی کی بلاول سے ملاقات، عمران خان کو فون

چیئرمین سینیٹ صادق سنجرانی نے پاکستان تحریک انصاف کے چیئرمین عمران خان کو فون کیا اور حمایت پر ان کا شکریہ ادا کیا جبکہ انہوں نے چیئرمین پیپلز پارٹی بلاول بھٹو سے بھی ملاقات کی۔

پاکستان تحریک انصاف کی جانب سے جاری اعلامیے کے مطابق نو منتخب چیئرمین سینیٹ صادق سنجرانی نے چیئرمین پی ٹی آئی عمران خان کو ٹیلی فون کیا اور چیئرمین سینیٹ کے انتخاب میں حمایت پر ان کا شکریہ ادا کیا۔

صادق سنجرانی نے کہا کہ بلوچستان کے عوام عمران خان کے تہہ دل سے مشکور ہیں اور وہ وفاق کی علامت کے طور پر ابھرے ہیں۔

انہوں نے کہا کہ بلوچستان کے عوام کو پارلیمان میں اہم مقام دلوانے پر عمران خان کے مشکور ہیں اور آپ نے مجھ سے جو توقعات وابستہ کیں، ان پر پورا اتروں گا۔

ن لیگ کو شکست، صادق سنجرانی چیئرمین اور سلیم مانڈوی والا ڈپٹی چیئرمین سینیٹ منتخب

چیئرمین سینیٹ کیلئے صادق سنجرانی کو 57 ووٹ ملے جبکہ ڈپٹی چیئرمین سینیٹ کے امیدوار سلیم مانڈوی والا نے 54 ووٹ حاصل کئے

اعلامیے میں کہا گیا ہے کہ پی ٹی آئی چیئرمین عمران خان نے بھاری اکثریت سے کامیاب ہونے پر صادق سنجرانی کو مبارکباد دی۔

عمران خان نے کہا کہ صادق سنجرانی کاانتخاب آئین و جموریت کی فتح اور خاندانی سیاست کی شکست ہے۔

علاوہ ازیں چیئرمین سینیٹ منتخب ہونے کے بعد صادق سنجرانی بلوچستان کے دیگر ارکان کے ہمراہ اسلام آباد میں زرداری ہاؤس پہنچے جہاں انہوں نے چیئرمین پیپلز پارٹی بلاول بھٹو زرداری سے ملاقات کی۔

اس موقع پر وزیراعلیٰ بلوچستان عبدالقدوس بزنجو بھی موجود تھے۔

یاد رہے کہ پاکستان تحریک انصاف، پیپلزپارٹی، بلوچستان اور فاٹا کے آزاد سنیٹرز کے مشترکہ امیدوار صادق سنجرانی 57 ووٹ حاصل کرکے چیئرمین سینیٹ منتخب ہوئے جب کہ ان کے مدمقابل حکومتی اتحاد کے امیدوار راجہ ظفر الحق نے 46 ووٹ لیے۔

ڈپٹی چیئرمین کے انتخاب میں بھی اپوزیشن اتحاد نے کامیابی حاصل کی اور پیپلزپارٹی کے سلیم مانڈوی والا 54 ووٹ حاصل کرکے ڈپٹی چیئرمین منتخب ہوئے۔