07 مئی ، 2018 
عمران خان، نواز شریف ایک جیسی سیاست کرتے ہیں، بلاول
07 مئی ، 2018
منڈی بہاؤالدین: پاکستان پیپلز پارٹی (پی پی پی) چیئرمین بلاول بھٹو زرداری نے کہا ہے کہ سابق وزیراعظم نواز شریف خلائی مخلوق کی بات اس لیے کررہے ہیں کیوں کہ ان کی مدد نہیں ہورہی۔
منڈی بہاءالدین میں ممبر سازی کیمپ میں خطاب کے دوران انہوں نے کہا کہ عمران خان اور نواز شریف ایک جیسی سیاست کرتے ہیں، دونوں کی پالیسیاں ایک ہیں جبکہ پیپلز پارٹی نے ہمیشہ عوامی سیاست کی ہےاور عوام کی طاقت پر بھروسہ کیا ہے۔
ان کا کہنا تھا کہ ن لیگ کی حکومت نے زراعت کو تباہ کردیا ہے، غریب مر رہے ہیں، یہ کس منہ سے خوشحالی کی بات کرتے ہیں۔
بلاول بھٹو زرداری نے کہا کہ کسانوں کو باردانہ نہیں مل رہا کسان جائیں تو جائیں کہاں، ہم نے ہمیشہ کسان دوستی کا ثبوت دیا۔
انہوں نے کہا کہ میرا آپ سے نظریے کا رشتہ ہے، جو نظریہ ذوالفقار بھٹو اور بے نظیر بھٹو کا تھا وہی میرا نظریہ ہے۔
چیئرمین پی پی پی نے کہا کہ پنجاب کے کسانوں نے ہمیشہ پیپلزپارٹی کا ساتھ دیا، یقین ہے کہ آئندہ بھی یہاں کے عوام میرا ساتھ دیں گے۔
انہوں نے کہا کہ ن لیگ نے کسانوں کو تباہ کردیا ہے، کسان کو اس کی فصل کی ٹھیک قیمت نہیں مل رہی، پیپلز پارٹی نے وفاق میں آکر گندم کی قیمت 600 سے بڑھاکر 1200روپے کی۔
ان کا مزید کہنا تھا کہ امیروں کو زیادہ امیر بنانے سے ملک خوشحال نہیں ہوتا۔
انہوں نے کہا کہ میری سیاست جمہوری اور وفاقی سیاست ہے، ہم نے اپنی جانیں دیں، شہادتیں پائیں۔
بلاول بھٹو نے کہا کہ جس نے میرا ساتھ دینا ہے وہ میرےساتھ چلے اور جس نے میرا ساتھ چھوڑنا ہے وہ چلاجائے، میں نے بتیاں بجھا دی ہیں۔
