15 مئی ، 2018 
14 پر تین وکٹیں گرنے کے بعد انجانے خوف میں مبتلا تھے، سرفراز
15 مئی ، 2018
ڈبلن میں آئرلینڈ کے خلاف تاریخی ٹیسٹ میچ میں پاکستان کرکٹ ٹیم شکست سے بال بال بچ گئی، دوسری اننگز میں 3 وکٹ گرنے کے بعد پاکستان شکست کے شدید ترین خطرے سے دوچار تھی۔
ڈبلن ٹیسٹ میں 160 رنز کے ہدف کے تعاقب میں پاکستانی اننگز کا آغاز تباہ کن انداز میں ہوا اور چوتھے اوور کی تیسری گیند پر 14 رنز پر 3 وکٹیں گر گئیں۔
اگر پاکستان ٹیم اس تاریخی ٹیسٹ میں اپ سیٹ ہوجاتی تو وہ ٹیسٹ کرکٹ کی تاریخ میں چوتھی ٹیم بن جاتی جس نے حریف ٹیم کو فالو آن کرایا لیکن میچ نہ جیت سکی۔
اس سے قبل تینوں بار مخالف ٹیم کو فالو آن کرانے کے بعد آسٹریلیا کو شکست کا سامنا کرنا پڑا ہے، ایک بار بھارت نے اور دو بار آسٹریلیا کو انگلینڈ نے ہرایا۔
1877 میں میلبورن میں آسٹریلیا نے اپنا پہلا ٹیسٹ میچ کھیلا تھا اور وہ دنیا کی واحد ٹیم ہے جسے پہلے ٹیسٹ میں جیت نصیب ہوئی تھی۔
قومی کرکٹ ٹیم کے کپتان سرفراز احمد نے اعتراف کیا کہ جب تین وکٹیں گر گئیں تو ہماری تشویش بڑھ رہی تھی اور ہم انجانے خوف میں مبتلا تھے۔
سرفراز احمد کا کہنا ہے کہ آئرلینڈ کو ہرانے کے بعد اب ہماری نظریں انگلینڈ کے خلاف لارڈز ٹیسٹ پر ہیں، پاکستان ٹیم اس چیلنج پر پورا اترنے کے لئے تیار ہے، انگلینڈ کی سیریز آسان نہیں ہے لیکن ہم کوشش کریں گے کہ توقعات پوری کریں۔
انہوں نے کہا کہ ڈبلن ٹیسٹ کی دوسری اننگز میں کنڈیشن بیٹنگ کے لیے سازگار نہیں تھی لیکن صورتحال کے مطابق امام الحق اور بابر اعظم نے بہت اچھی بیٹنگ کی۔
قومی کپتان نے کہا کہ پاکستان ٹیم نے میچ کے دوران کچھ اہم کیچ ڈراپ کیے جس نے ہماری مشکلات بڑھا دیں جبکہ آئر لینڈ نے بڑی شراکت بناکر ہمیں دباؤ میں رکھا۔
خیال رہے کہ آئرلینڈ کے خلاف ٹیسٹ میچ میں فتح بطور کپتان سرفراز احمد کی بھی پہلی کامیابی ہے۔
آئرلینڈ کرکٹ ٹیم کے کپتان ولیم پورٹرفیلڈ نے کہا کہ اگر 200 رنز کا ہدف ہوتا تو ہم مزید قریب آسکتے تھے، اب ہماری نظریں بھارت کے خلاف ٹی ٹوئنٹی سیریز پر مرکوز ہیں۔
خیال رہے کہ ٹیسٹ ٹیم کا درجہ ملنے کے بعد یہ آئرلینڈ کا پہلا ٹیسٹ میچ تھا جس میں اسے شکست کا سامنا کرنا پڑا ہے۔
آئرلینڈ کے خلاف واحد ٹیسٹ میچ میں پاکستان کی جانب سے بیٹسمین امام الحق اور آل راؤنڈر فہیم اشرف نے ٹیسٹ ڈیبیو کیا جبکہ آئرلینڈ کی پوری ٹیم ہی پہلی بار ٹیسٹ میچ کھیل رہی تھی۔
آئرلینڈ کے خلاف ٹیسٹ میچ کے بعد اب پاکستان 24 مئی سے انگلینڈ کے خلاف دو ٹیسٹ میچوں کی سیریز کھیلے گا جبکہ پاکستان اور اسکاٹ لینڈ کے درمیان دو ٹی ٹوئنٹی میچز 12 اور 13 جون کو کھیلے جائیں گے۔
