ایمنسٹی اسکیم سے فائدہ نہ اٹھانے والوں کو کوئی رعایت نہیں دیں گے: وزیراعظم

اسلام آباد: وزیراعظم عمران خان نے 30 جون کے بعد ٹیکس چوروں کے خلاف کارروائی کا عندیہ دیتے ہوئے کہاہےکہ ایمنسٹی اسکیم اور ٹیکس ریٹرنز کی تاریخ میں توسیع سے بھی جو فائدہ نہ اٹھائے اسے کوئی رعایت نہیں دیں گے۔

وزیراعظم عمران خان کی زیر صدارت بنی گالہ میں حکومت کی اقتصادی ٹیم کا اجلاس ہوا جس میں مشیر خزانہ حفیظ شیخ، وزیر مملکت ریونیو حماد اظہر، چیئرمین ایف بی آر شبر زیدی اور وزارت خزانہ کے دیگر حکام نے شرکت کی۔

ایمنسٹی اسکیم سے فائدہ اٹھائیں اور اپنے اثاثے ظاہر کریں، وزیراعظم کی قوم سے اپیل

22 کروڑ پاکستانیوں میں سے صرف ایک فیصد ٹیکس ادا کرتے ہیں،ایک فیصد پاکستانی 22 کروڑ پاکستانیوں کا بوجھ اٹھارہے ہیں، وزیراعظم کا قوم کے نام پیغام

ذرائع کے مطابق اجلاس میں 11 جون کو پیش کیے جانے والے بجٹ کے خدوخال پر مشاورت کی گئی اور چیئرمین ایف بی آر نے ایمنسٹی اسکیم پر اب تک ہونے والی پیشرفت پر وزیراعظم کو بریفنگ دی جب کہ ٹیکس ریٹرنز کی تاریخ میں توسیع اور حکومت کو ملنے والے ٹیکس ریونیو پر حماد اظہر نے بریف دیا۔

ذرائع نے بتایا کہ دورانِ اجلاس وزیراعظم نے اقتصادی ٹیم سے سوال کیا کہ بڑے مگرمچھوں کو ٹیکس نیٹ میں کیسے لایا جائے؟ صرف تنخواہ دار طبقہ ہی کیوں ٹیکس دے؟

ذرائع کے مطابق وزیراعظم نے 30 جون کے بعد ٹیکس چوروں کے خلاف کریک ڈاون کاعندیہ دے دیا۔

وزیراعظم عمران خان کا کہنا تھا کہ ایمنسٹی اسکیم اور ٹیکس ریٹرنز کی تاریخ میں توسیع سے بھی جو فائدہ نہ اٹھائے اسے کوئی رعایت نہیں دیں گے، ٹیکس چوروں کو پکڑنے کیلئے تمام ادارے حکومت کے ساتھ ہیں۔