محمد وسیم آسٹریلیا کیخلاف ٹیسٹ میں شکست کے بعد ٹیم کے دفاع میں آگئے

پاکستان کے سابق ٹیسٹ کرکٹر اور سلیکشن کمیٹی کے رکن محمد وسیم نے آسٹریلیا میں پہلے ٹیسٹ میں شکست کے بعد نوجوان ٹیم کا دفاع کرتے ہوئے کہا ہے کہ کھلاڑی نوجوان اور ناتجربہ کار ہیں، تھوڑا تحمل کا مظاہرہ کریں، یہی کھلاڑی مستقبل میں اچھے نتائج دیں گے۔

کراچی میں میڈیا سے گفتگو میں محمد وسیم نے کہا کہ آسٹریلیا میں نوجوان کرکٹرز نے بہتر کارکردگی کا مظاہرہ کیا، نسیم شاہ اور شاہین آفریدی کی سب ہی نے تعریف کی۔

 محمد وسیم جو ڈومیسٹک کرکٹ میں 'ناردرن' کے ہیڈ کوچ بھی ہیں، نے کہا کہ آسٹریلیا کو اسی کے گراؤنڈ میں ہرانا پہلے ہی مشکل تھا اور پاکستان کی ٹیم میں بھی تجربے کی کمی تھی لیکن امید ہے آئندہ اور بہتر کرکٹ ہوگی۔

برسبین ٹیسٹ میں پاکستان کو اننگز اور 5 رنز سے شکست

آسٹریلیا کی پہلی اننگز کی 340 رنز کی سبقت کے تعاقب میں پاکستانی ٹیم دوسری اننگز میں 335 رنز پر آل آؤٹ ہو گئی

ایک سوال پر رکن سلیکشن کمیٹی کا کہنا تھا کہ برسبین ٹیسٹ میں محمد رضوان اور بابر اعظم کی کارکردگی  پاکستان کے لیے مثبت باتیں ہیں، امید ہے یہ کھلاڑی اور بہتر کھیل پیش کریں گے۔

انہوں نے مزید کہا کہ ٹیسٹ میچز میں کامیابی کے لیے ضروری ہے کہ حریف کی وکٹیں حاصل کی جائیں، ٹیسٹ میچز میں حریف کو دو مرتبہ آؤٹ کیے بغیر کامیابی حاصل کرنا ممکن نہیں ۔

آسٹریلیا میں بولنگ کرنا آسان نہیں، پاکستانی بولنگ ناتجربہ کار ہے: وقار یونس

عمران خان ڈومیسٹک کا ٹاپ پرفارمر ہے لیکن بدقسمتی سے اس میچ میں نہیں چلا، یہی بولرز مستقبل میں اچھا پرفارم کریں گے: بولنگ کوچ وقار یونس

یاسر شاہ کے دفاع میں وسیم کا کہنا تھا کہ وہ اس لیے ناکام ہو رہے ہیں کیوں کہ فاسٹ بولر شروع میں نئے گیند سے وکٹ نہیں لے رہے، اسپنرز کا رول اس وقت شروع ہوتا ہے جب اوپر سے فاسٹ بولر 3 سے 4 وکٹیں حاصل کرلیتے ہیں لیکن پاکستانی بولرز نئے گیند سے وکٹ حاصل نہیں کرپارہے۔

انہوں نے کہا کہ محمد عباس پاکستان کا بہترین بولر ہے، اس کو نہ کھلانے کا فیصلہ یقینی طور پر ٹیم مینجمنٹ نے سوچ سمجھ کر کیا ہوگا، ان کو لگا ہوگا کہ عمران بہتر فارم میں ہے، اس لیے عمران کو موقع دیا گیا۔

واضح رہے کہ پاکستان اور آسٹریلیا کے درمیان پہلے ٹیسٹ میں میزبان ٹیم نے گرین کیپس کو اننگز اور 5 رنز سے شکست دی  ہے۔