کورونا ویکسین کی قیمت کتنی ہوگی؟

دنیا کیلئے اچھی خبر ہے کہ عالمی وبا کورونا وائرس کی متعدد ویکسین اب بڑے پیمانے پر استعمال کیلئے دستیاب ہونے جارہی ہیں۔

اس سلسلے میں امریکی کمپنیوں نے سب پر بازی مارلی ہے جبکہ روس اور چین نے بھی اپنی اپنی ویکسین کے 90 فیصد سے زائد مؤثر ہونے کا دعویٰ کیا ہے اور بڑے پیمانے پر ان ویکیسنز کی تیاری بھی شروع کردی ہے۔

برطانیہ نے کورونا ویکسین وسیع پیمانے پر استعمال کرنے کی اجازت دے دی

حکومت نے فائزر اور بائیو این ٹیک کی ویکسین کے استعمال کی اجازت دی، ویکسی نیشن پروگرام آئندہ ہفتے سے شروع کیا جائیگا: برطانوی میڈیا

اس حوالے سے سب سے پہلے جس کمپنی نے کورونا ویکسین کی تیاری کا دعویٰ کیا وہ امریکا کی فائزر کمپنی ہے جس نے جرمن کمپنی بائیو این ٹیک کے ساتھ مل کر یہ ویکسین تیار کی ہے۔

فائزر نے امریکا اور یورپی یونین سے باضابطہ درخواست بھی کردی ہے کہ اس کی ویکسین کو بڑے پیمانے پر استعمال کرنے کی منظوری دی جائے اور انگلینڈ منظوری دینے والا پہلا ملک بھی بن گیا ہے اور آئندہ ہفتے سے ویکسینیشن شروع بھی کردے گا۔

امریکی بائیوٹیک کمپنی کا کورونا ویکسین 94 فیصد تک مؤثر ہونے کا دعویٰ

امریکی کمپنی موڈرنا کا کہنا ہے کہ ان کی جانب سے تیار کی جانے والی کووڈ-19 کی ویکسین آزمائشی مرحلے میں 94.5 فیصد تک مؤثر ثابت ہوئی

مختلف ممالک نے فائزر کو ویکسین کے لاکھوں ڈوز تیار کرنے کے پہلے ہی کروڑوں ڈالرز کے آرڈر بھی دے دیے ہیں۔ پاکستان نے بھی کورونا ویکسین کے حصول کیلئے 150 ملین ڈالر (24 ارب روپے سے زائد) مختص کرنے کا فیصلہ کیا ہے تاہم سوال یہ ہے کہ عام آدمی کو یہ ویکسین کتنے پیسوں میں دستیاب ہوگی؟

امریکی جریدے فوربز کے مطابق فائزر اور بائیو این ٹیک کی تیار کردہ ویکسین کی قیمت اتنی زیادہ نہیں جتنی خیال کی جارہی تھی۔

کمپنی نے امریکا کے لیے ویکسین کے ایک ڈوز کی قیمت 19.50 (تقریباً 3127 روپے) ڈالر رکھی ہے اور اسی قیمت پر امریکی حکومت نے فائزر کو  1.95 ارب ڈالر (ایک کھرب 43 ارب 73 کروڑ 48 لاکھ پاکستانی روپے سے زائد) کا کنٹریکٹ دیا ہے۔

کورونا کے مریض کیلئے ویکسین کے کم سے کم دو ڈوز ضروری ہیں اس حساب سے ایک مریض کو کورونا ویکسین کی دو ڈوز  39 ڈالر (6254 روپے) میں پڑے گی۔

امریکی و جرمن کمپنی کے اشتراک سے بننے والی کورونا ویکسین 95 فیصد تک مؤثر

تجربے میں ویکسین 170 افراد پر آزمائی گئی جس میں 95 فیصد کامیاب نتائج سامنے آئے

 اس کے علاوہ ایک اور امریکی کمپنی موڈرنا نے بھی ویکسین تیار کی ہے اور اس نے اپنے ایک ڈوز کی قیمت 25 ڈالر (4 ہزار روپے) رکھی ہے یعنی ایک مریض کو دو ڈوز کے 50 ڈالر (8 ہزار روپے سے زائد) دینے ہوں گے۔

امریکیوں کیلئے یہ قیمت کچھ زیادہ نہیں کیوں کہ وہاں زکام کی سالانہ ویکسین کی قیمت بھی 40 ڈالر ہے۔

پاکستان میں یہ ویکسین کتنے میں دستیاب ہوگی اس کا فیصلہ حکومت کرے گی جبکہ اگر امریکا سے ویکسین امپورٹ کی جائے گی تو قیمت زیادہ ہوگی تاہم اگر پاکستان میں ہی امریکا کے تعاون سے ویکسین تیار کی جائے تو قیمت کم ہوسکتی ہے۔

’کورونا ویکسین عوام کو مفت فراہم کرنے کا فیصلہ‘

کورونا ویکسین کے لیے حکومت فنڈ اکٹھا کررہی ہے، 2021 کی دوسری سہ ماہی میں ویکسین لگانا شروع کردیں گے: پارلیمانی سیکرٹری صحت نوشین حامد

اس کے علاوہ ممکن ہے کہ پاکستان چین کی تیار کردہ ویکسین کی بھی پاکستان میں آزمائش کرے جس کی قیمت امریکی ویکسین سے کم ہوسکتی ہے۔

پاکستان میں بڑے پیمانے پر ویکسین کا استعمال اگلے سال کی دوسری سہہ ماہی میں ہونے کا امکان ہے جس کا مطلب یہ ہے کہ فی الحال احتیاطی تدابیر پر عمل روکنا نہیں ہے۔ 

امید ہے کہ مذکورہ ویکسین اس وبا کو دبانے میں کارگر ثابت ہوگی تاہم ماہرین کا کہنا ہے کہ کسی بھی ویکسین کی کامیابی کا دارومدار اس کے بڑے پیمانے پر استعمال پرہوگا، ویکسین جتنی زیادہ آسانی سے زیادہ سے زیادہ لوگوں کو دستیاب ہوگی اتنی ہی جلدی اس وبا سے نجات ملے گی، ویکسین کے محدود استعمال سے ہرڈ امیونٹی حاصل کرنا مشکل ہوگا اور وائرس لوگوں میں موجود رہے گا اور پھیلتا رہے گا۔