15 فروری ، 2022 
’مجھے دھمکیاں مل رہی ہیں‘، پروین رِند ننگے پاؤں عدالت پہنچ گئیں
15 فروری ، 2022
کراچی: پیپلزیونیورسٹی شہید بینظیر آباد میں مبینہ طورپر ہراسانی اور تشدد کا شکار نرسنگ ہاؤس افسر پروین رندننگے پاؤں عدالت پہنچ گئیں۔
سندھ ہائیکورٹ میں کیس کی سماعت کے سلسلے میں پیپلزمیڈیکل یونیورسٹی شہید بینظیر آباد کی طالبہ پروین رند عدالت پہنچیں جہاں میڈیا سے گفتگو میں انہوں نے کہا کہ ملزم غلام مصطفیٰ راجپوت ابھی تک گرفتار نہیں ہوا، اسے سپورٹ کیا جا رہا ہے۔
انہوں نے کہا کہ سندھ کی بیٹیوں کو مار کر خودکشی کا رنگ دیا جاتا ہے، ہاسٹل میں بچیاں خودکشیاں نہیں کرتیں انہیں پنکھے پرلٹکایا جاتا ہے۔
پروین رند کاکہنا تھا کہ ان کے کمرے میں تین خواتین داخل ہوئیں، تشدد کیا، گھسیٹا گیا، پوری یونیورسٹی کے سامنے مارا گیا، انتظامیہ کو شکایات کی گئی لیکن کوئی ایکشن نہیں لیا گیا۔
انہوں نے کہا کہ میری جان کو خطرہ ہے اور دھمکیاں مل رہی ہیں، میری ہاؤس جاب کسی اور شہر میں منتقل کی جائے، ہاؤس جاب کو ایک ماہ ہوا ہے تعلیم جاری رکھنا چاہتی ہوں۔
