پی ایس ایل سے دستبرداری، فالکنر کے الزامات پر پی سی بی کا ردعمل بھی سامنے آ گیا

پاکستان کرکٹ بورڈ نے پاکستان سپر لیگ کی ٹیم کوئٹہ گلیڈی ایٹرز میں شامل آسٹریلین کرکٹر جیمز فالکنر کے الزامات کا نوٹس لے لیا۔

پی سی بی کا کہنا ہے کہ جیمز فالکنر کے جھوٹے اور گمراہ کن الزامات کا نوٹس لیا ہے، اس بارے میں جلد تفصیلی بیان جاری کیا جائے گا۔

دوسری جانب ذرائع کا بتانا ہے کہ پی سی بی نے جمیز فالکنر کو معاہدے کی 70 فیصد ادائیگی کر دی تھی لیکن جیمز فالکنر رقم کی وصولی سے مکر گئے۔

پی سی بی سے تنازع: کوئٹہ گلیڈی ایٹرز کے جیمز فوکنر نے پی ایس ایل چھوڑ دیا

فوکنر نے لیگ سے دستبرداری کی وجہ پاکستان کرکٹ بورڈ کو قرار دیتے ہوئے کہا کہ ان سے معاہدے کی پاسداری نہیں کی گئی ہے۔

ذرائع کا کہنا ہے کہ جیمز فالکنر دوسرے بینک اکاؤنٹ میں رقم طلب کرنا چاہتے تھے، پی سی بی نے پہلی ادائیگی واپس طلب کی تو جیمز فالکنر نے انکار کر دیا۔

ذرائع کا بتانا ہے کہ جیمز فالکنر نے لاہور میں ہوٹل پراپرٹی کو بھی نقصان پہنچایا، چیک آؤٹ کے وقت پی سی بی کو ازالہ ادا کرنا پڑا، اس کے علاوہ جیمز فالکنر نے امیگریشن حکام سے بھی بدتمیزی کی۔