09 مئی ، 2022 
پیپلز پارٹی کے علاوہ تمام جماعتوں نے انتخابی مہم شروع کر دی ہے: شیخ رشید
09 مئی ، 2022
سابق وزیر داخلہ شیخ رشید احمد کا کہنا ہے کہ پیپلز پارٹی کے علاوہ تمام سیاسی جماعتیں انتخابی عوامی رابطہ مہم شروع کر چکی ہیں۔
اسلام آباد ہائیکورٹ کے باہر میڈیا سے گفتگو کرتے ہوئے شیخ رشید احمد کا کہنا تھا کہ نااہل حکومت ہم پر مسلط کر دی گئی ہے۔
شیخ رشید کا کہنا تھا کہ وزیراعظم شہباز شریف نے خود پر فرد جرم عائد نہیں ہونے دی، اے این ایف کیس میں ملزمان پر وکلاء نے فرد جرم عائد نہیں ہونے دی جبکہ میرا بھتیجا روز عدالت میں ذلیل و خوار ہورہا ہے۔
ان کا کہنا تھا عوام کو پیغام دینا چاہتا ہوں کہ جلد انتخابات ہو رہے ہیں، ملک کے مسائل کا حل جلد انتخابات ہیں، ملک کے مقتدر حلقوں سے بھی کہتا ہوں کہ جلد انتخابات کرائیں۔
انہوں نے کہا کہ جے یو آئی ف اور ن لیگ نے بھی عوام رابطہ مہم شروع کر دی ہے، پیپلز پارٹی کے علاوہ تمام جماعتیں انتخابی عوامی رابطہ مہم شروع کر چکی ہیں۔
سابق وفاقی وزیر کا کہنا تھا کہ نواز شریف نے 14 مرتبہ فوج اور آرمی چیف پر تنقید کی، گزشتہ روز بھی جنرل فیض کا نام لےکر رگڑا دیا گیا۔
