22 جولائی ، 2022 
’اب کوئی بھی وفاداری تبدیل کرتا ہے تو وہ سیاسی موت کے پروانے پر دستخط کریگا‘
22 جولائی ، 2022
لاہور: پی ٹی آئی کے وائس چیئرمین شاہ محمود قریشی نے کہا ہےکہ اب کوئی بھی وفاداری تبدیل کرتا ہے تو وہ بے وقعت ہو جائے گا اور سیاسی موت کے پروانے پر دستخط کرےگا۔
پنجاب اسمبلی کے باہر میڈیا سے گفتگو کرتے ہوئے شاہ محمود قریشی نے کہا کہ 17 جولائی کے ضمنی الیکشن میں عوام نے پیسہ چلانے والوں کو مسترد کردیا، مریم نواز کہتی ہیں کہ انہوں نے ہار تسلیم کرلی ہے جب کہ دوسری طرف آصف زرداری نوٹوں کے بیگ لیے پھرتے ہیں،عوام نے لوٹوں اور پیسوں کی سیاست دفن کردی ہے۔
انہوں نے کہا کہ اب کوئی بھی وفاداری تبدیل کرتا ہے تو وہ بے وقعت ہو جائے گا اور سیاسی موت کے پروانے پر دستخط کرےگا۔
اس موقع پر اسد عمر کا کہنا تھا کہ الیکشن کمیشن پی ٹی آئی، پیپلز پارٹی اور (ن) لیگ کے کیسز کا فیصلہ ایک ساتھ سنائے ، بند کمروں میں فیصلے کرنے کا وقت گزر گیا ،اب فیصلے عوام کریں گے ۔
انہوں نے مزید کہا کہ الیکشن کمیشن فریق بن چکا ہے، پاکستان میں جمہوریت کو پروان چڑھانے کے لیے آزاد الیکشن کمیشن ناگزیر ہے۔
