30 اپریل ، 2023 
فواد کا ثاقب نثار کے بیٹے اور پی ٹی آئی امیدوار کی آڈیو کو جعلی قرار دینے پر اصرار
30 اپریل ، 2023
تحریک انصاف کے رہنما فواد چوہدری سابق چیف جسٹس ثاقب نثار کے بیٹے نجم ثاقب اور پاکستان تحریک انصاف (پی ٹی آئی) کے امیدوار ابوذر کی آڈیو کو جعلی قرار دینے پر مُصر ہیں۔
گزشتہ روز سابق چیف جسٹس ثاقب نثار کے بیٹے نجم ثاقب اور پی ٹی آئی امیدوار ابوذر کی آڈیو کال سامنے آئی تھی، ابوذر نے سابق چیف جسٹس کے بیٹے کو کہا تھاکہ آپ کی کوششیں رنگ لے آئیں، بس جلدی سے ٹکٹ چھپوا دیں۔
نجم ثاقب نے کہا تھا کہ بس بابا کا شکریہ ادا کرنے اور انھیں جپھی ڈالنے آجانا، دوسری کال میں نجم ثاقب نے میاں عزیر سے مبینہ طور پر کہا تھا کہ ایک کروڑ بیس لاکھ سے کم نہ لینا، میری بات نہیں مانی تو میں تم سے بات نہیں کروں گا۔
اس حوالے سے فواد چوہدری آڈیو کو جعلی قرار دینے پر مُصر ہیں۔ انہوں نے اپنی ٹوئٹ میں دعویٰ کیا کہ چھان بین کے بعد پیسے دینے کا الزام جھوٹ نکلا ہے، ساتھ ہی مطالبہ کیا کہ جعلی آڈیو جاری کرنے والے اصل چہرے بے نقاب کیے جائیں۔
خیال رہے کہ سابق چیف جسٹس پاکستان ثاقب نثار نے جیو نیوز کے پروگرام نیا پاکستان کے میزبان شہزاد اقبال سے گفتگو میں اپنے بیٹے کی آڈیو کو درست تسلیم کیا تھا۔
