لاہور: پرویز الہیٰ کی گرفتاری کیلئے پولیس کی ان کےگھر کی تلاشی

لاہور: پنجاب پولیس نے محکمہ اینٹی کرپشن کی ٹیم کے ساتھ پاکستان تحریک انصاف (پی ٹی آئی) کے صدر اور سابق وزیراعلیٰ پنجاب چوہدری پرویز الہیٰ کی گرفتاری کے لیے ان کے گھر پر چھاپہ مارا اور گھر کی تلاشی لی تاہم پرویز الہیٰ گھر پر موجود نہ تھے۔

اینٹی کرپشن کورٹ نے آج پرویز الہیٰ کی عبوری ضمانت خارج کردی تھی۔

عبوری ضمانت خارج ہونے کے بعد پولیس کی بھاری نفری پرویز الہیٰ کی گلبرگ میں واقع ان کی رہائش گاہ پہنچ گئی،  پولیس کے ہمراہ اینٹی کرپشن کی ٹیم بھی موجود تھی۔

پرویز الہیٰ کےگھر کے اطراف ظہور الہیٰ روڈ ٹریفک کے لیے بند کردیا گیا،ظہور الہیٰ روڈ سے ملحقہ گلیاں بھی بندکردی گئیں۔

چوہدری پرویزالہیٰ کے ترجمان اقبال چوہدری کا کہنا  تھا کہ چوہدری پرویز الہیٰ گھر پر موجود نہیں ، اس وقت گھر میں صرف چوہدری پرویز الہیٰ کی فیملی ہے، پولیس سرچ وارنٹ دکھائے تو گھرکی تلاشی لینے دیں گے۔

وکیل پرویز الہیٰ کا کہنا تھا کہ 2 مئی تک جتنے مقدمات ہوئے ان میں پرویز الہیٰ کی ضمانت کے آرڈر موجود ہیں۔

دوسری جانب اینٹی کرپشن حکام کا کہنا تھا کہ موبائل لوکیشن کے مطابق پرویز الہیٰ گھر میں ہی موجود ہیں۔

تھوڑی دیر بعد  پولیس اور اینٹی کرپشن کے اہلکار پرویز الہیٰ کے گھر داخل ہوگئے، ان کا کہنا تھا کہ متعلقہ فردکو سرچ وارنٹ دکھائیں گے، ایس ایس پی صہیب اشرف اور ایس پی عمارہ شیرازی سمیت ڈائریکٹر اینٹی کرپشن عمران احمر بھی اہلکاروں کے ساتھ تھے۔

اس موقع پر کسی بھی قسم کی مزاحمت دیکھنے میں نہیں آئی، گھر کی تلاشی کے بعد پولیس اور اینٹی کرپشن کی ٹیم واپس روانہ ہوگئی۔ پرویز الہیٰ گھر پر موجود نہ تھے۔

خیال رہےکہ سابق وزیراعلیٰ پنجاب پرویز الہیٰ کے خلاف ترقیاتی منصوبوں میں مبینہ کرپشن کا کیس ہے۔

اینٹی کرپشن عدالت سے پرویز الٰہی کی عبوری ضمانت خارج، گرفتاری کا خدشہ

پرویز الٰہی نے گزشتہ پیشی پر میڈیکل سرٹیفکیٹ پیش کیا تھا جو جعلی ہے: پراسیکیوشن کا عدالت میں مؤقف

اینٹی کرپشن اور پولیس کا 8 گھنٹوں تک جاری آپریشن ناکام، پرویز الٰہی کو گرفتار نہ کیا جا سکا

تقریباً 8 گھنٹوں تک جاری آپریشن میں پولیس نے پرویز الٰہی کی رہائشگاہ سے 27 افراد کو حراست میں لیا ، اینٹی کرپشن ٹیم نے یہ کارروائی گوجرانوالہ میں درج مقدمہ میں کی