12 جون ، 2023 
کراچی کے مہاجروں کا مجھ پر احسان ہے: شعیب اختر
12 جون ، 2023
سابق کرکٹر شعیب اختر کا کہنا ہے کہ کراچی کا بالخصوص کراچی کے مہاجروں کا ان پر بے حد احسان ہے۔
ایک پوڈ کاسٹ انٹرویو کے دوران کراچی کے حالات پر بات کرتے ہوئے شعیب اختر نے کہا کہ نیویارک کی سڑکیں کراچی سے زیادہ خراب ہیں لیکن یہ صورتحال کسی بھی شہر یا ملک کیلئے مناسب نہیں۔
کراچی والوں کے پاس ٹاپ کلاس دماغ ہیں: سابق کرکٹر
کراچی والوں کی تعریف کرتے ہوئے سابق کرکٹر نے کہا کہ میرے کئی اچھے دوست کراچی سے ہیں، کراچی والوں کے پاس ٹاپ کلاس دماغ ہیں، پروفیشنل ہیں، پنجاب کا ٹیلنٹ بہت زیادہ ہے لیکن کراچی والوں کی منجمنٹ کا کوئی ثانی نہیں ۔
کراچی والوں نے شعیب اختر کی مدد کب اور کیسے کی؟
کراچی اور کراچی کے مہاجروں کے ساتھ گزارے وقت کا تذکرہ کرتے ہوئے اسپیڈ اسٹار کا کہنا تھا کہ 1992 میں جب کراچی کے حالات خراب تھے ، اس وقت کراچی میں وہاں کے دوستوں کے ساتھ بائیک، بسوں اور مختلف سواریوں پر سفر کیا، ناظم آباد 10 نمبر کے دوستوں کے گھر ٹھہرا، سب لڑکے مجھے ساتھ لے کر جاتے اور ساتھ لے کر آتے تھے۔
کبھی کراچی کیلئے کچھ کرنا پڑا تو میری جان بھی حاضر ہے: شعیب اختر
سابق فاسٹ بولر نے کہا کہ کراچی میں رہنے والے شخص کو پتا ہونا چاہیے کہ بات کیسی کرنی ہے اور مجھے جب یہ سکھایا گیا تو میں نے فوراًسیکھ لیا۔
شعیب اختر کا مزید کہنا تھا کہ کراچی والوں کے مجھ پر کئی احسانات ہیں، ان احسانات کو میں آج تک نہیں بھول سکا، کبھی کراچی کیلئے کچھ کرنا پڑا تو میری جان بھی حاضر ہے،کراچی کے علاوہ میں پاکستان کی ہر قومیت سے دل سے محبت کرتا ہوں اور ہر قومیت کیلئے میری جان حاضر ہے۔
