08 جولائی ، 2023 
ملکی ائیرپورٹس پرطیاروں سے پرندے ٹکرانے سے پی آئی اےکو لاکھوں ڈالرکا نقصان
08 جولائی ، 2023
ملک کے مختلف ائیرپورٹس پر طیاروں سے پرندے ٹکرانے کے واقعات میں اضافہ ہوا ہے جس کے باعث لاکھوں ڈالرکا نقصان ہوچکا ہے۔
ائیرپورٹ ذرائع کے مطابق 6 ماہ کے دوران طیاروں سے پرندے ٹکرانے کے 61 واقعات ہوئے ہیں، 6 ماہ میں قومی ائیرلائن (پی آئی اے) کےطیاروں کےساتھ پرندے ٹکرانے کے 39 واقعات ہوئے ہیں۔
ذرائع کا کہنا ہےکہ طیاروں سے پرندے ٹکرانے سے قومی ائیرلائن کو لاکھوں ڈالرکا نقصان ہوا ہے، 4 واقعات میں طیاروں کے انجن کو نقصان پہنچا، بہت سی پروازیں منسوخ کرنا پڑیں، سب سے زیادہ پرندے ٹکرانےکے واقعات جناح انٹرنیشنل ائیرپورٹ کراچی پر ہوئے۔
ائیرپورٹ ذرائع کے مطابق دوسرے نمبر پر لاہور کے علامہ اقبال ائیرپورٹ پر پرندے ٹکرانے کے واقعات ہوئے،6 ماہ کے دوران کراچی ائیر پورٹ پر 19 اور لاہور ائیرپورٹ پر17 پرندے طیاروں سے ٹکرائے۔
اس کے علاوہ اسلام آباد ائیرپورٹ پر 6 ماہ کے دوران پانچ واقعات رپورٹ ہوئے، سیالکوٹ ائیرپورٹ پر ایک، سکھر ائیرپورٹ پر 2،کوئٹہ 4، پشاور ایک،گلگت ایک اور ملتان ائیرپورٹ پر 2 واقعات رپورٹ ہوئے۔
