02 اگست ، 2023 
پی ٹی آئی نے راجہ ریاض اور نورعالم خان سمیت 13 ارکان کو پارٹی سے نکال دیا
02 اگست ، 2023
پاکستان تحریک انصاف (پی ٹی آئی) نے قومی اسمبلی میں قائد حزب اختلاف راجہ ریاض اور پارلیمنٹ کی پبلک اکاؤنٹس کمیٹی کے چیئرمین نورعالم خان سمیت 13 ارکان قومی اسمبلی کوپارٹی سے نکال دیا۔
پی ٹی آئی کے اعلامیے کے مطابق راجہ ریاض اور نور عالم خان کے علاوہ رمیش کمار وانکوانی، نزہت پٹھان، وجیہہ قمر، سردار ریاض محمود خان مزاری، رانا محمد قاسم نون کو بھی پارٹی سے نکال دیا گیا ہے۔
پی ٹی آئی اعلامیے میں کہا گیا ہے کہ نواب شیر، مخدوم زادہ سید باسط احمد سلطان، افضل خان ڈھانڈلہ، محمد عبدالغفار وٹو، عامر طلال گوپانگ اور احمد حسین دہر کو پارٹی سے نکال دیا اور بنیادی رکنیت ختم کردی ہے۔
پارٹی چھوڑنے والوں کو برطرفی کے نوٹس جاری کردیے گئے ہیں۔
تحریک انصاف نے تمام رہنماؤں کو کسی بھی طرح سے پارٹی کا نام اور عہدہ استعمال کرنے سے گریز کرنے کی ہدایت کی ہے۔
سیکرٹری جنرل عمر ایوب نے پارٹی پالیسی کی خلاف ورزی پر ملک شوکت کو بھی شوکاز نوٹس جاری کر دیا۔
اعلامیے کے مطابق شوکت علی کو مجاز اتھارٹی کے علم میں لائے بغیر نئی پارٹی اجلاس میں شرکت پر شوکاز نوٹس جاری کیا گیا اور ان سے دو دن کے اندر وضاحت طلب کرلی ہے۔
خیال رہے کہ گزشتہ روز پی ٹی آئی نے پارٹی چھوڑنے والے 22 سابق ارکان قومی و صوبائی اسمبلی کو بھی نکال دیا تھا جن میں سابق وزیراعلیٰ پنجاب عثمان بزدار بھی شامل ہیں۔
