’ہماری ٹیم ورلڈکپ جیت سکتی ہے‘ سابق اولمپیئن اور دیگر شخصیات جیت کیلئے پرامید

سابق اسکواش پلیئر  جہانگیرخان سمیت دیگر کھلاڑیوں نے قومی کرکٹر ٹیم کیلئے نیک خواہشات کا اظہار کرتے ہوئے ٹیم کے ٹی ٹوئنٹی ٹائٹل جیتنے کی امید ظاہر کی ہے۔

کرکٹ کے علاوہ دیگر کھیلوں سے تعلق رکھنے والے نامور پاکستانی کھلاڑیوں نے بھی آئی سی سی ٹی ٹوئنٹی ورلڈکپ 2024 میں حصہ لینے والی پاکستانی ٹیم کی کامیابی کے لیے نیک خواہشات کا اظہار کرتے ہوئے امید ظاہر کی ہے کہ یہ ٹیم قوم کی توقعات پر پورا اترے گی۔

ان نامور کھلاڑیوں نے ان خیالات کا اظہار پی سی بی ڈیجیٹل سے خصوصی گفتگو میں کیا ہے۔

10 برٹش اوپن اور 6 ورلڈ اوپن ٹائٹلز جیتنے والے جہانگیرخان کا کہنا ہے کہ پوری قوم کی نیک خواہشات اس ٹیم کے ساتھ ہیں اور ہمیں امید ہے کہ یہ ٹیم ہمیں اچھی خبر سنائے گی، ایک کھلاڑی کی حیثیت سے میں یہ بات سمجھ سکتا ہوں کہ یہ کھلاڑی کے لیے بہترین موقع ہوتا ہے کہ اس نے جس طرح سخت محنت اور ٹریننگ کی ہوتی ہے وہ اسے ایک بہترین پرفارمنس میں تبدیل کرے،ہارجیت کھیل کا حصہ ہے لیکن اگر فائٹ کرکے ہارتے ہیں تو اس سے ہر کوئی مطمئن ہوتا ہے۔

1978 کا ورلڈکپ جیتنے والی پاکستان ہاکی ٹیم کے کپتان اصلاح الدین نے کہا کہ پاکستان ٹیم میں بے پناہ ٹیلنٹ موجود ہے، پاکستان پہلے بھی ٹی ٹوئنٹی ورلڈکپ جیت چکا ہے اور اب قوم پھر منتظر ہے کہ ٹیم دوبارہ عالمی چیمپئن بن کو واپس لوٹے گی، پوری قوم ٹیم کی کامیابی کے لیے دعاگو ہے۔

امید ہے ہم 15 سال بعد دوبارہ عالمی چیمپئن بنیں گے: 2009 ورلڈکپ کی فاتح ٹیم کے کھلاڑی پُر امید

ان کھلاڑیوں کا کہنا ہے کہ بابراعظم اور ان کے ساتھی کھلاڑی 15 سال پہلے کی جیت کو دہرانے کی صلاحیت رکھتے ہیں

دو بار ہاکی ورلڈکپ  کے گولڈ میڈلسٹ سابق اولمپیئن سمیع اللہ کا کہنا ہےکہ ہمیں اس ٹیم سے بڑی امیدیں وابستہ ہیں اور یہ ہماری امیدوں پر پورا اترے گی، پاکستان کرکٹ بورڈ نے اس ٹیم کی بہت اچھی تیاری کرائی ہے، کھلاڑیوں نے بھی سخت محنت کی ہے، کھلاڑیوں کو چاہیے کہ وہ ہر میچ کو دل لگاکر کھیلیں۔

ٹینس گرینڈ سلم فائنل کھیلنے والے واحد پاکستانی کھلاڑی اعصام الحق کو بھی امید ہے کہ بابراعظم کی قیادت میں پاکستان ٹیم ٹرافی جیت کر وطن آئے گی اور ہمیں فخر کرنے کاموقع فراہم کرے گی۔

جیولن تھرو کے کامن ویلتھ گیمز گولڈ میڈلسٹ ارشد ندیم نے کہا کہ جس طرح ٹیم نے سخت محنت کی ہے اور اس عالمی ایونٹ کے لیے تیاری کی ہے اس کا پھل ضرور ملے گا۔

کے ٹو کی چوٹی سر کرنے والے دنیا کے سب سے کم عمر کوہ پیما شہروز کاشف کہتے ہیں کہ ہماری توقعات اس ٹیم کے ساتھ جڑی ہوئی ہیں اور ہمیں امید ہے کہ پاکستان ٹیم یہ ورلڈ کپ ضرور جیتے گی۔

پاکستان ویمنز فٹبال ٹیم کی سابق کپتان ہاجرہ خان نے کہا کہ پوری فٹبال کمیونٹی پاکستان کرکٹ ٹیم کو سپورٹ کررہی ہے، کبھی آپ ہارتے ہیں کبھی جیتتے ہیں لیکن آپ ایک بہترین ٹیم کے ذریعے کامیابی حاصل کرسکتے ہیں۔

سیف گیمز ٹیبل ٹینس گولڈ میڈلسٹ عارف خان کا کہنا ہے کہ پاکستان ٹیم انفرادی طور پر غیرمعمولی صلاحیتوں کے حامل کھلاڑیوں پر مشتمل ہے، جب یہ اکٹھے ہوتے ہیں تو ایک مضبوط ٹیم سامنے آتی ہے، ہم سب کو اس ٹیم سے بڑی توقعات وابستہ ہیں کہ یہ ٹیم ٹی ٹوئنٹی ورلڈ کپ میں اچھا کھیل پیش کرے گی۔