ایک عام عادت کو اپنا کر آپ بجلی کے ماہانہ بل میں 5 سے 10 فیصد تک کمی لاسکتے ہیں

مہنگائی میں جس طرح اضافہ ہو رہا ہے، اس کے باعث بیشتر پاکستانی شہری یوٹیلیٹی بلوں کو کم کرنے کی کوشش کر رہے ہیں۔

بجلی کی قیمت میں مسلسل اضافہ ہو رہا ہے اور ہر ماہ اس کا بل دیکھ کر بیشتر افراد پریشان ہو جاتے ہیں اور انہیں سمجھ نہیں آتا کہ اتنا زیادہ بل کیوں آیا۔

اب ہر گھر میں کتنی بجلی خرچ ہوتی ہے اس کا انحصار تو ان کی ضروریات پر ہوتا ہے۔

مگر اکثر افراد کی ایک عام عادت بھی بجلی کے بل میں لگ بھگ 10 فیصد اضافے کا باعث بنتی ہے۔

جی ہاں واقعی ایسا ہوتا ہے اور بیشتر افراد مختلف برقی مصنوعات کو سوئچ آف کرنے کے بعد بھی پلگ سوئچ میں لگائے رکھتے ہیں، جس سے وہ مصنوعات ہر وقت معمولی مقدار میں بجلی خرچ کرتی رہتی ہیں۔

بجلی کے بل میں کمی لانا چاہتے ہیں؟ تو یہ آسان طریقے مددگار ثابت ہوں گے

سردیوں کے مقابلے میں موسم گرما کے دوران بجلی کا خرچ زیادہ ہوتا ہے اور اس کا مطلب ہے کہ بل کی رقم بھی زیادہ ہوگی۔

اس کے لیے ویمپائر انرجی کی اصطلاح استعمال ہوتی ہے اور امریکا کے محکمہ توانائی کے مطابق ہر سال لوگ اس مد میں 100 سے 200 ڈالرز اضافی خرچ کرتے ہیں۔

یہ رقم پاکستان میں ہزاروں یا لاکھوں روپے بن جاتی ہے اور اوسطاً ایک گھر کی 10 فیصد بجلی انرجی ویمپائر چوس جاتے ہیں۔

تو ان مصنوعات کے بارے میں جانیں جن کو پلگ نکال کر آپ اپنے بجلی کے بل میں ہر ماہ کم از کم 5 سے 10 فیصد تک کمی لا سکتے ہیں۔

کمپیوٹر آلات

کیا آپ ڈیسک ٹاپ کمپیوٹر یا لیپ ٹاپ استعمال کرتے ہیں؟ تو جان لیں کہ یہ ڈیوائسز اس وقت بھی بجلی خرچ کر رہی ہوتی ہیں جب آپ انہیں استعمال نہیں کر رہے ہوتے۔

اے سی استعمال کرتے ہوئے بجلی کے بلوں کو کم رکھنے میں مددگار 9 آسان طریقے

اے سی کے استعمال سے بجلی کا بل بہت زیادہ بڑھ جاتا ہے کیونکہ یہ مشین بہت زیادہ توانائی خرچ کرتی ہے۔

امریکا کی بیکرلے نیشنل لیبارٹری کے مطابق ایک ڈیسک ٹاپ کمپیوٹر کا پلگ اگر ہمیشہ لگا رہے تو وہ سال بھر میں 23 ڈالرز سے زائد کی اضافی بجلی خرچ کر دیتا ہے۔

اسی طرح مانیٹر 1.53 ڈالرز جبکہ موڈیم یا راؤٹر لگ بھگ 7 ڈالرز کی کی بجلی سال بھر میں خرچ کردیتا ہے۔

یعنی یہ ڈیوائسز سال بھر میں 40 یا 50 ڈالرز کی اضافی بجلی خرچ کر دیتی ہیں یا ماہانہ 3 سے 4 ڈالرز خرچ ہوتے ہیں۔

پاکستان کے مطابق دیکھا جائے تو ہر ماہ یہ ڈیوائسز بجلی کے بل میں ایک ہزار روپے کے قریب اضافہ کرسکتی ہیں۔

یہ صرف ایک کمپیوٹر یا راؤٹر کی بات ہے جبکہ اب گھر میں عموماً ایک سے زائد کمپیوٹر یا لیپ ٹاپس ہوتے ہیں، تو ان کے پلگ ہمیشہ نکال کر رکھا کریں۔

ٹیلی ویژن (ٹی وی) اور سیٹ ٹاپ باکس

اگر آپ سمجھتے ہیں کہ ریموٹ کنٹرول سے ٹی وی بند کرنے کے بعد وہ بجلی نہیں خرچ کر رہا تو یہ خیال غلط ہے۔

اسٹینڈ بائی ٹی وی سال بھر میں 20 ڈالرز سے زائد کی اضافی بجلی خرچ کردیتا ہے۔

اسی طرح سیٹ ٹاپ باکس استعمال کرتے ہیں تو اس سے ہر سال 50 ڈالرز کے قریب اضافی بجلی خرچ ہوتی ہے کیونکہ ان کا پلگ بھی ہر وقت آن رہتا ہے۔

اسپیکر اور ساؤنڈ سسٹمز

اگر آپ کے گھر میں اسٹیریو سسٹم موجود ہے تو جان لیں کہ وہ کافی بجلی خرچ کرتا ہے۔

آڈیو سسٹمز سال بھر میں 10 ڈالرز کی اضافی بجلی چوس لیتے ہیں تو ان کے پلگ نکال کر آپ ہر ماہ چند سو روپے کی بچت کر سکتے ہیں۔

موبائل فون چارجر

یہ کہنے کی ضرورت نہیں کہ اب ہر گھر میں 2 سے 3 موبائل فونز موجود ہوتے ہیں اور ان کو روزانہ کئی بار چارج بھی کرنا پڑتا ہے۔

زیادہ تر افراد موبائل چارجر استعمال نہ کرنے پر بھی ان کے سوئچ آن رکھتے ہیں جس کے باعث چارجر بجلی خرچ کرتے رہتے ہیں۔

اسی طرح بیشتر افراد رات بھر اپنا فون چارج کرنے کے عادی ہوتے ہیں جس سے بھی بجلی کے بل میں ہر ماہ چند سو روپے کا اضافہ ہو جاتا ہے۔