22 دسمبر ، 2024 
کراچی: ڈیفنس سے بزرگ شہری بازیاب، مقابلے میں 2 اغواکار ہلاک، اغوا کی ویڈیو سامنے آگئی
22 دسمبر ، 2024
کراچی کے پوش علاقے ڈیفنس میں پولیس سے مقابلے میں 2 اغوا کار ہلاک ہوگئے جبکہ شہری کو بازیاب کرا لیا گیا۔
ڈی آئی جی ساؤتھ اسد رضا کے مطابق مقابلے کے دوران 2 اغوا کار فرار بھی ہوئے جن کی تلاش جاری ہے جبکہ ہلاک ملزمان سے گاڑی، اسلحہ اور دیگر سامان برآمد ہوا ہے۔
ڈی آئی جی اسد رضا نے بتایا کہ ملزمان کا ایک ساتھی رکشہ ڈرائیور ہے جو ٹارگٹ کی نشاندہی کرتا تھا، ملزمان نے 3مہینے قبل بھی شارع فیصل سے بزنس مین کو اغوا کیا تھا۔
انہوں نے بتایا کہ آج صبح مقابلےمیں دواغواکارمارےگئے جن کی شناخت عقیل اور اعجاز کے ناموں سے ہوئی ہے، ہلاک آغوا کاروں نےگزشتہ روز شہری کوڈیفنس خیابان اتحادسےاغواکیاتھا۔
ڈی آئی جی ساؤتھ کا بتانا ہے کہ مغوی بزرگ نذیر احمد کو گزشتہ روز ان کے گھر خیابان اتحاد کے باہر سے اغوا کیا گیا تھا، مغوی فجر کی نماز کی ادائیگی کے لیے گھر سے باہر آئے اور گاڑی میں اپنے نواسے کا انتظار کر رہے تھے۔
اسد رضا کا بتانا ہے کہ کار سوار 4 اغوا کار مغوی کو اسلحے کے زور پر لے گئے، مغوی کا نواسا آیا تو اس کو نانا گاڑی میں نہیں ملے، مغوی کے نواسے نے سی سی ٹی وی چیک کی تو نانا کے اغوا کا پتہ چلا، جس کے بعد اس نے پولیس کو اطلاع دی اور واقعے کا مقدمہ ساحل تھانے میں درج کیا گیا تھا۔
اغوا کے واقعے کی سی سی ٹی وی بھی سامنے آئی جس میں کارسوار ملزمان کو شہری کواغواکرتے دیکھاجاسکتا ہے۔
ڈی آئی جی ساؤتھ کا کہنا ہے کہ ملزمان شہری کواغواکر کے سکھر میں کچے کے علاقےمیں لے جانا چاہتے تھے، ملزمان کا شہری کو اغوا کرنے کے بعد تاوان کے لیے فون کرنےکاپلان تھا۔
مزید خبریں :
مردان میں فائرنگ سے میاں، بیوی اور بیٹا قتل
2 گھنٹے پہلے
’بچے بہت چیختے تھے‘، ماں نے جڑواں بچوں کے گلے کاٹ کر قتل کر ڈالا
20 دسمبر ، 2024
