انٹرٹینمنٹ

پشپا میں الو ارجن کی آواز پر ڈبنگ کیلئے کتنی محنت کرنا پڑی؟ بالی وڈ اداکار نے بتا دیا

05 جنوری ، 2025

پشپا میں الو ارجن کی آواز پر ڈبنگ کیلئے کتنی محنت کرنا پڑی؟ بالی وڈ اداکار نے بتا دیا — فلم کے ہندی ورژن نے 806 کروڑ بھارتی روپے کی کمائی کی ہے— فوٹو:فائل

بھارت کی تیلگو انڈسٹری کی فلم ’پشپا 2‘ ریلیز کے کئی ہفتے بعد بھی ایک کے بعد ایک کمائی کے ریکارڈ توڑ رہی ہے۔

فلم کو تامل، تیلگو، ملیالم اور ہندی میں ڈب کرکے جاری کیا گیا ہے۔ فلم اب تک بھارت سمیت دنیا بھر سے 1799 بھارتی کروڑ کماچکی ہے اور صرف فلم نے بھارت سے 1199 کروڑ بھارتی روپے کمائی کی ہے۔

فلم کے ہندی ورژن نے 806 کروڑ بھارتی روپے کی کمائی کی ہے اور اس میں بھی بالی وڈ اداکار شریاس تلپاڈے نے الو ارجن کے کردار کی ڈبنگ کی ہے۔

یہ بھی پڑھیں

شریاس کو ہندی ڈبنگ کیلئے ایک کروڑ بھارتی روپے سے زائد فیس دی گئی ہے اور اداکار نے حال ہی میں ڈبنگ کے دوران پیش آنے والی مشکلات سے پردہ اٹھایا ہے۔

ایک پوڈ کاسٹ میں گفتگو کرتے ہوئے شریاس کا کہنا تھاکہ فلم میں کئی مناظر میں الو ارجن منہ میں کچھ نہ کچھ چبا کر بات کر رہے ہیں تو ایسے سین پر ڈبنگ کیلئے بہت محنت کرنا پڑی۔

انہوں نے کہا کہ میں نے پہلے ایسی ہی کوشش کی لیکن اس میں آرٹیفشل لگ رہا تھا پھر پان رکھ کر ڈب کی تو آواز بیٹھنے لگ گئی پھر روئی رکھ کر ڈب کی۔

ایک سوال کے جواب میں بالی وڈ اداکار نے بتایاکہ میں آج تک الو ارجن سے نہیں ملا۔

خیال رہے کہ فلم میں الو ارجن، فہد فیصل، راشمیکا سمیت دیگر نے مرکزی کردار ادا کیا ہے اور اس فلم کا تیسرا سیکوئل بھی بنایا جائے گا۔