آئی پی ایل میں سنچری بنانیوالے 14 سالہ بھارتی کرکٹر کی عمر پر سوال اٹھ گئے، پرانا بیان وائرل

انڈین پریمیئر لیگ (آئی پی ایل) میں سنچری بنانے والے 14 سالہ بھارتی کرکٹر  ویبھو سوریاونشی کی عمر پر سوال اٹھ گئے۔

گزشتہ دنوں آئی پی ایل میں راجستھان رائلز کے کم عمر ترین کھلاڑی ویبھو سوریاونشی نے کرکٹ کی دنیا میں تہلکہ مچایا اور 14 سال کی عمر میں سنچری اسکور کرکے نئی تاریخ رقم کی۔

نوجوان کھلاڑی نے گجرات ٹائٹنز کے خلاف 35 گیندوں پر سنچری بنا کر ناصرف آئی پی ایل بلکہ کسی بھی بھارتی کی جانب سے تیز ترین ٹی ٹوئنٹی سنچری کا ریکارڈ قائم کردیا۔

 ویبھو سوریاونشی آئی پی ایل میں سنچری اسکور کرنے والے کم عمر ترین کھلاڑی بھی بنے۔

جہاں 14 سالہ سوریاونشی کی بیٹنگ کی تعریف کی جارہی ہے وہیں ان کی عمر کے حوالے سے بھی سوالات اٹھ رہے ہیں کہ ان کی عمر 14 سال نہیں بلکہ تقریباً 16 سال ہے۔

سابق بھارتی باکسر وجیندر سنگھ نے سوشل میڈیا پوسٹ کے ذریعے بظاہر سوریاونشی کی عمر پر سوال اٹھایا کہ کیا اب کرکٹ میں بھی عمر کی جعلسازی عام ہو چکی ہے؟انہوں نے کہا کہ 'بھائی آج کل عمر چھوٹی کر کے کرکٹ میں بھی کھیلنے لگے ہیں'۔

اس کے علاوہ سوشل میڈیا پر صارفین بھی سوریا ونشی کی عمر کے حوالے سے  سوال اٹھا رہے ہیں۔

ان سوالات کے اٹھنے کی اصل وجہ سوریاونشی کا وائرل ہونے والا ایک پرانا انٹرویو ہے جو 2023 میں لیا گیا تھا جس میں سوریا ونشی نے بتایا تھا کہ ان کی عمر 14 سال ہے۔

اگر 2023 میں سوریا ونشی 14 سال کے تھے تو اس حساب سے 2025 میں ان کی عمر 16 سال بنتی ہے۔

بھارتی میڈیا ہو یا پھر مشہور کرکٹ ویب سائٹ کرک انفو، سوریا ونشی کی عمر ابھی 14 سال ہی بتارہے ہیں۔

کرک انفو کی ویب سائٹ پر سوریا ونشی کی تاریخ پیدائش 27 مارچ سن 2011 درج ہے۔اس حساب سے ان کی عمر 14 سال اور 36 دن بنتی ہے لیکن اگر دوسری جانب سوریا کے 2023 کے انٹرویو کو دیکھیں تو اس حساب سے وہ 16 سال کے ہیں۔

 کیا سوریا ونشی نے آئی پی ایل میں جان بوجھ کر اپنی اصل عمر چھپائی؟ انہوں نے اپنی عمر کے حوالے سے جھوٹ بولا، یہ وہ سوالات ہیں جو اس وقت سوشل میڈیا پر اٹھائے جارہے ہیں۔  

اس حوالے سے سوریا ونشی یا آئی پی ایل فرنچائز راجستھان رائلز کا کوئی ردعمل سامنے نہیں آیا۔ 

واضح رہے کہ آئی پی ایل کی میگا نیلامی میں راجستھان رائلز نے سوریاونشی کو ایک کروڑ 10 لاکھ بھارتی روپے میں خریدا تھا۔

14 سال کی عمر میں ڈیبیو، نوجوان کرکٹر نے آئی پی ایل میں نئی تاریخ رقم کر دی

سوریاونشی نے راجستھان کی نمائندگی کرتے ہوئے لکھنؤ کے خلاف میچ میں شاندار ڈیبیو کیا اور سب کے دل جیتے

14 سالہ کھلاڑی کا دنیائے کرکٹ میں تہلکہ، آئی پی ایل میں ناقابلِ یقین تاریخ رقم کردی

ویبھو نے بطور بھارتی کھلاڑی یوسف پٹھان کا ریکارڈ توڑا، یوسف نے 2010 کے ایونٹ میں راجستھان رائلز کی جانب سے کھیلتے ہوئے ممبئی انڈینز کے خلاف یہ ریکارڈ بنایا تھا