29 مئی ، 2025 
حسن علی کی قومی ٹیم میں شاندار واپسی پر وہاب ریاض کا دلچسپ تبصرہ
29 مئی ، 2025
بنگلا دیش کے خلاف میچ میں حسن علی کی شاندار پرفارمنس پر قومی ٹیم کے سابق فاسٹ بولر وہاب ریاض نے حسن علی کی پریکٹس کی ویڈیو شیئر کرتے ہوئے اس پر شاندار تبصرہ بھی کیا۔
گزشتہ روز لاہور میں کھیلے گئے پہلے ٹی ٹوئنٹی میچ میں پاکستان نے بنگلا دیش کو 37 رنز سے شکست دیکر تین ایک روزہ میچوں کی سیریز میں ایک صفر کی برتری حاصل کی تھی۔
پاکستان کی جانب سے حسن علی نے شاندار کم بیک کرتے ہوئے 30 رنز دیکر 5 کھلاڑیوں کو آؤٹ کیا تھا جبکہ شاداب خان کو آل راؤنڈ پرفارمنس پر میچ کا بہترین کھلاڑی قرار دیا گیا تھا۔
قومی ٹیم کے سابق فاسٹ بولر وہاب ریاض نے حسن علی کی ایک پرانی ویڈیو شیئر کرتے ہوئے حسن علی کو مبارکباد دی اور لکھا، آپ ایک حقیقی مقابلہ کرنے والے ہیں۔
وہاب ریاض نے ہنستے ہوئے ایموجی کے ساتھ مذاق کرتے ہوئے لکھا یہ ہوتا ہے جب آپ ہم جیسے لوگوں کے ساتھ ٹریننگ کرتے ہیں، مذاق کر رہا ہوں، یہ سب آپ کی محنت ہے، آپ کے لیے اور آپ کی فیملی کے لیے بہت خوش ہوں۔
