پاکستان کرکٹ ٹیم کے کپتان مصباح الحق کو نیوزی لینڈ کے خلاف کرائسٹ چرچ ٹیسٹ میں سلو اوور ریٹ پر ایک ٹیسٹ کے لیے معطل کردیا گیا۔ جبکہ ان پر میچ فیس کا چالیس فیصد جرمانہ عائد کیا گیا ہے۔ پاکستان کی پوری ٹیم پر میچ ریفری ویسٹ انڈیز کے رچی رچرڈسن نے بیس فیصد جرمانہ عائد کیا ہے۔

مصباح الحق سسر کے انتقال کی وجہ سے پیر کو کرائسٹ چرچ سے براستہ کراچی لاہور پہنچ گئے۔ جہاں انہوں نے تدفین میں شرکت کی۔ ان کی پابندی کا اطلاق ہیملٹن ٹیسٹ پر ہوگا ۔ تاہم میچ بارش کی نذر ہوگیا تو پابندی کا اطلاق آسٹریلیا کے خلاف برسبین ٹیسٹ سے ہوگا۔

مصباح اور پاکستان ٹیم کے خلاف سزا کا اعلان انٹرنیشنل کرکٹ کونسل نے پیر کو کیا ۔ مصباح الحق دورہ نیوزی لینڈ ادھورہ چھوڑ کر وطن واپس آگئے ہیں، ان کی غیر موجودگی میں قومی ون ڈے ٹیم کے کپتان اظہر علی ٹیم کی قیادت کریں گے۔ مصباح الحق کو اپنے سسر کے انتقال کی خبر پہلے ٹیسٹ میچ کے چوتھے دن ملی ۔ ان کی اہلیہ بھی ان کے ساتھ نیوزی لینڈ میں تھیں۔

واضح رہے کہ مصباح الحق کے سسر گزشتہ کئی ہفتوں سے علیل تھے۔ مصباح الحق نے کرائسٹ چرچ میں اپنے پچاس ویں ٹیسٹ میں پاکستانی ٹیم کی قیادت کی تاہم پاکستانی ٹیم کو اس ٹیسٹ میں آٹھ وکٹوں سے شکست کا سامنا کرنا پڑا۔ یہ دوسرا موقع ہے کہ مصباح الحق کپتان بننے کے بعد کسی ٹیسٹ میں حصہ نہیں لے سکیں گے۔

مصباح الحق اپنے کریئر میں دوسری مرتبہ سلو اوور ریٹ کی زد میں آئے ہیں ۔ 2012 میں وہ سری لنکا کے خلاف پانچویں ون ڈے میں سلو اوور ریٹ کا شکار ہوئے تھے جس کے نتیجے میں وہ گال میں کھیلا گیا پہلا ٹیسٹ میچ نہیں کھیل سکے تھے اور ان کی جگہ محمد حفیظ نے قیادت کی تھی۔

کیویز کے خلاف دوسرا 25 نومبر سے ہملٹن میں کھیلا جائے گا۔ کرائسٹ چرچ ٹیسٹ میں پاکستانی ٹیم مقررہ وقت کے لحاظ سے اپنے ہدف 103اوورز کے مقابلے میں دو اوورز پیچھے رہی۔ اس سے قبل اگست میں انگلینڈ کے خلاف اوول ٹیسٹ میں بھی مصباح الحق سلو اوور ریٹ کے مرتکب قرار پائے تھے اور آئی سی سی کے قوانین کی رو سے 12 ماہ کے عرصے میں دوسری مرتبہ اس جرم کا ارتکاب کرنے پر ان پر پابندی عائد کی گئی۔

آئی سی سی کے ترجمان کا کہنا ہے کہ اگر پی سی بی مصباح الحق کو ہیملٹن بھیجنے کا فیصلہ کرتا ہے تو بھی وہ اس معطلی کے سبب قومی ٹیم کے نیوزی لینڈ کے خلاف ہملٹن میں شیڈول دوسرے ٹیسٹ میچ میں شرکت نہیں کر سکیں گے۔ واضح رہے کہ اگر کوئی ٹیم ایک سال کے دوران دو مرتبہ سلو اوور ریٹ کی مرتکب ہوتی ہے تو اس کے کپتان کو ایک میچ کی معطلی کا سامنا کرنا پڑتا ہے۔