کراچی کے علاقے لانڈھی انڈسٹریل ایریا میں واقع گارمنٹس فیکٹری میں لگنے والی آگ کو لگے 10 گھنٹے سے زائد کا وقت گزر گیا آگ پر تاحال قابو نہیں پایا جا سکا ہے۔ شہر بھر کا فائر بریگیڈ عملہ آگ بجھانے میں مصروف ہے۔

آج سہ پہر کراچی کے علاقے لانڈھی کی ایک گارمنٹس فیکٹری میں اچانک آگ بھڑک اٹھی جس نے دیکھتے ہی دیکھتے شدت اختیار کرلی، واقعہ کے بعد فائر بریگیڈ کو طلب کرلیا گیا جس نے آگ بجھانے کے لیے امدادی کارروائیاں شروع کیں اور آگ کو تیسرے درجہ کی قرار دیتے ہوئے شہربھر سے فائر ٹینڈر طلب کرلی گئی۔

حکام کا کہنا ہے کہ فائر بریگیڈ کی 16 گاڑیاں، ایک اسنارکل اور 2 واٹر باؤزر آگ بجھانے میں مصروف ہیں۔

آگ کی شدت میں اضافہ ہوگیا ہے۔ مخدوش ہونے والی عمارت کی دیواریں گرنا شروع ہوگئیں، آگ کی شدت اور عمارت مخدوش ہونے کی وجہ سے فائر فائٹرز کا اندر داخل ہونا ناممکن ہوگیا۔

ریسکیو حکام کا کہنا ہے کہ فیکٹری میں مزدوروں کی بڑی تعداد کام کرتی ہے تاہم نماز جمعہ کی وجہ سے فیکٹری میں کم لوگ موجود تھے، آگ لگنے کے وقت جو لوگ فیکٹری میں موجود تھے انہوں نے بھاگ کر اپنی جانیں بچائیں۔