ایک امریکی خلائی کمپنی کی جانب سے زمین سے 90 ہزار فٹ کی بلندی پر صدر ڈونلڈ ٹرمپ کے خلاف احتجاجی ٹوئٹ بھیجا گیاہے جس میں ان کے خلاف نا زیبا الفاظ کا استعمال کیا گیا ہے۔

ڈونلڈ ٹرمپ کے بر سر اقتدار آتے ہی امریکا بھر میں ان کے خلاف مظاہرے اور احتجاج ہوتے رہتے ہیں ۔ 22 اپریل کو بھی’ارتھ ڈے‘ کے موقع پر امریکا میں سائنس ریلی نکالی جائے گی۔ یہ ریلی ٹرمپ کی جانب سے متنازعہ منصوبوں پر تعمیراتی کام آگے بڑھانے کے خلاف نکالی جائے گی۔

خلائی تحقیق کو فروغ دینے والی اس امریکی کمپنی نےاسی سائنس ریلی کے ساتھ اظہار یکجہتی کرتے ہوئے یہ ٹوئٹ بھیجا ہے۔ ٹوئٹ کے ذریعے صدر ڈونلڈ ٹرمپ کی توجہ حاصل کرنے کی بھی کوشش کی گئی ہے۔

سائنسی ماہرین کی سربراہی میں ہونے والے اس انوکھے احتجاج کے تحت ٹرمپ انتظامیہ کے سائنس مخالف ایجنڈے کو اجاگر کیا گیا ہے۔

سیاروں کے آس پاس تیرتے اس ٹوئٹ کی دو سے ڈھائی گھنٹے کی ویڈیو بھی جاری کی گئی ہے۔

اس خلائی کمپنی نے اپنے یو ٹیوب چینل پر پیغام میں لکھا ہے کہ وہ خلا میں اپنے پہلے احتجاج پر فخر محسوس کرتی ہے۔