نواز شریف آج وطن واپس پہنچ کر کل احتساب عدالت میں پیش ہونگے

سابق وزیراعظم نواز شریف آج لندن سے وطن واپس پہنچیں گے اور کل احتساب عدالت کے روبرو پیش ہوں گے۔

سابق وزیراعظم نواز شریف کی وطن واپسی کے حوالے سے سامنے آنے والی تمام افواہیں دم توڑ گئیں اور اب مسلم لیگ (ن) کے ذرائع کا کہنا ہے کہ نواز شریف آج رات لندن سے وطن واپس پہنچیں گے۔

ذرائع کے مطابق سابق وزیراعظم نواز شریف کل احتساب عدالت کے روبرو بھی پیش ہوں گے جہاں ان پر نیب کے تین ریفرنسز میں فرد جرم عائد کی جائے گی۔ 

نواز شریف اہلیہ کلثوم نواز کی عیادت کے لئے لندن میں موجود ہیں اور اس سے قبل بھی وہ احتساب عدالت میں پیشی کے لئے لندن سے وطن واپس پہنچے تھے۔

نیب ریفرنسز: نواز شریف، مریم اور کیپٹن صفدر پر فرد جرم 13 اکتوبر کو عائد ہو گی

عدالت نے نواز شریف، مریم اور کیپٹن (ر) صفدر کا مقدمہ حسن اور حسین سے الگ کردیا۔

خیال رہے کہ احتساب عدالت نے 9 اکتوبر کو سماعت کے دوران قومی احتساب بیورو کے تین ریفرنسز میں سابق وزیراعظم نواز شریف، مریم نواز اور کیپٹن (ر) محمد صفدر پر فرد جرم کے لئے 13 اکتوبر کی تاریخ مقرر کی تھی جب کہ عدالت نے حسن اور حسین نواز کا مقدمہ الگ کردیا۔

 کیس کا پس منظر

سپریم کورٹ کے پاناما کیس سے متعلق 28 جولائی کے فیصلے کی روشنی میں نیب نے شریف خاندان کے خلاف 3 ریفرنسز احتساب عدالت میں دائر کئے ہیں جو ایون فیلڈ پراپرٹیز، العزیزیہ اسٹیل ملز اور فلیگ شپ انویسمنٹ سے متعلق ہے۔

نیب کی جانب سے ایون فیلڈ اپارٹمنٹس ریفرنس میں سابق وزیراعظم نواز شریف ان کے بچوں حسن، حسین ، بیٹی مریم نواز اور داماد کیپٹن ریٹائرڈ محمد صفدر کو ملزم ٹھہرایا ہے۔

العزیزیہ اسٹیل ملز جدہ اور 15 آف شور کمپنیوں سے متعلق فلیگ شپ انویسٹمنٹ ریفرنس میں نواز شریف اور ان کے دونوں بیٹوں حسن اور حسین نواز کو ملزم نامزد کیا گیا ہے۔

سابق وزیراعظم نواز شریف نیب ریفرنس کا سامنا کرنے کے لئے 2 مرتبہ 26 ستمبر اور 2 اکتوبر کو ذاتی حیثیت میں احتساب عدالت کے روبرو پیش ہوئے تھے۔