حکومت نے بجلی کی قیمتوں میں اضافے کا فیصلہ ایک ہفتے کیلئے مؤخر کردیا

اسلام آباد: وفاقی حکومت نے اقتصادی رابطہ کمیٹی (ای سی سی)  کے آئندہ اجلاس تک بجلی کی قیمتوں میں اضافے کا فیصلہ مؤخر کردیا۔

وفاقی وزیر خزانہ اسد عمر کی زیر صدارت اقتصادی رابطہ کمیٹی (ای سی سی) کا اجلاس ہوا جس میں ایک ہفتے کیلئے بجلی کی قیمتوں میں اضافے کو مؤخر کردیا گیا۔

کمیٹی نے آئندہ اجلاس تک بجلی کی قیمتوں میں اضافہ نہ کرنے کا فیصلہ کیا،اس حوالے سے اگلے ہفتے ہونے والے ای سی سی اجلاس میں فیصلہ کیا جائے گا۔

کمیٹی نے نیشنل الیکٹرک پاور ریگولیٹری اتھارٹی (نیپرا) اور پاور ڈویژن کو آئندہ 3 سے 5 سال کے لیے پالیسی بنانے کی ہدایت کی جس سے بِلوں کی وصولی زیادہ سے زیادہ یقینی ہو۔ 

گیس کی قیمت میں 10 سے 143 فیصد تک اضافہ

گھریلو صارفین کیلئے گیس استعمال کے ماہانہ سلیب 3 سے بڑھا کر 7 کر دیئے گئے، وفاقی وزیر پٹرولیم غلام سرور خان

کمیٹی نے ہدایت کی کہ پالیسی میں لائن لاسز کم سے کم کرنے کا لائحہ عمل بھی بنایا جائے۔

کمیٹی نے گردشی قرضوں کی وصولی صارفین سے نہ کرنے کا بھی فیصلہ کیا ہے اور حکومت اپنے وسائل سے قرضہ پورا کرے گی۔

یاد رہے کہ وزارت توانائی نے تجویز دی تھی کہ بجلی کے نرخوں میں کم سے کم دو جبکہ زیادہ سے زیادہ چار روپے اضافہ کیا جائے۔

اس سے قبل اقتصادی رابطہ کمیٹی نے گیس کی قیمت میں 10 سے 143 فیصد تک اضافے کی منظوری دی تھی۔