’ہم بابر اعظم کے کیرئیر سے کھیلنے جا رہے ہیں‘

24 اکتوبر ، 2019

حکمراں جماعت پاکستان تحریک انصاف کے خیبر پختونخواہ سے تعلق رکھنے والے سینیٹر فیصل جاوید کا کہنا ہے کہ ہم قومی ٹیم کے نوجوان اور ابھرتے ہوئے بلے باز بابراعظم کے کیرئیر سے کھیلنے جا رہے ہیں۔

ایک ایسے مرحلے پر جب دورہ آسڑیلیا کے لیے منتخب ٹیسٹ اور ٹی 20اسکواڈ پر سوالات کیے جارہے ہیں سینیٹر فیصل جاوید بھی میدان میں آگئے ہیں۔

یاد رہے کہ وکٹ کیپر سرفراز احمد کو کپتانی سے ہٹائے جانے پر بھی فیصل جاوید نے سوشل میڈیا پر بورڈ کے فیصلے پر شدید تنقید کی تھی، اب ان کا دورہ آسڑیلیا کے لیے منتخب ٹیم پر خیال ہے کہ یہ کسی طور بھی مناسب اور متواز ن اسکواڈ نہیں لگتا۔

سینیٹر فیصل جاوید کا خیال ہے کہ ماضی میں آسڑیلیا میں پاکستان کی بڑے ناموں کے ساتھ کھیلنے والی ٹیموں کو خالی ہاتھ لوٹنا پڑا تھا، لگتا ہے کہ مصباح الحق کو یہ سب یاد نہیں، حیران ہوں کہ مصباح خود بطور کپتان دو سال قبل آسڑیلیا میں تین ٹیسٹ ہارنے کے باوجود ایسے فیصلے کیسے کر سکتے ہیں۔

انہوں نے مزید کہا کہ بابر اعظم پر انہیں ترس آرہا ہے، وہ ہمارا ایک اہم بلے باز ہے، اور ہم قیادت کا بوجھ ڈال کر اس کے کیرئیر سے کھیلنے جارہے ہیں۔

فیصل جاوید کہتے ہیں کہ مصباح الحق کے فیصلوں میں جھول نمایاں طور پر محسوس کیا جا سکتا ہے، انہیں خدشہ ہے کہ فاسٹ بولر نسیم شاہ اور موسی خان کو آسڑیلیا کی سخت کنڈیشن میں بناء کسی منصوبہ بندی کے جھونکا جارہا ہے۔

سینٹر فیصل جاوید جو 2007 اور 2011 کے آئی سی سی ورلڈ کپ کے دوران بطور ریڈیو کمنٹیٹر خدمات انجام دے چکے ہیں، کہتے ہیں کہ آسڑیلیا کا دورہ انتہائی اہمیت کا حامل ہے، ابھی سری لنکا کی سیریز کے زخم تازہ ہیں، ایسے میں آسڑیلیا میں ٹیم پاکستان کی جانے سے قبل ہی مشکلات عیاں ہیں۔

پی ٹی آئی سینیٹر کہتے ہیں کہ سابق کپتانوں محمد حفیظ اور شعیب ملک کو مصباح الحق کا نظر انداز کرنا سمجھ سے باہر ہے، وہ سمجھتے ہیں کہ ابھی دونوں کھلاڑیوں کی قومی ٹیم کو ضرورت ہے، نئے کھلاڑیوں کے نام پر ان تجربے کار کھلاڑیوں کو منتخب نہ کرنا خسارے کا سودا ہوگا۔