’آسٹریلوی کپتان ٹِم پین، رضوان کو تنگ کرنے کیلئے سرفراز کی یاد دلاتے رہے‘
21 نومبر ، 2019
تین سال بعد کیریئر کا دوسرا ٹیسٹ کھیلنے والے پاکستانی وکٹ کیپر محمد رضوان بد قسمت رہے اور انہیں امپائر نے نو بال پر آؤٹ قرار دے دیا جب کہ بیٹنگ کے دوران آسٹریلوی کپتان ٹِم پین بھی محمد رضوان کو تنگ کرنے کے لیے انہیں سرفراز کے شاٹس یاد دلاتے رہے۔
برسبین ٹیسٹ کے پہلے روز میں پاکستانی ٹیم آسٹریلیا کے خلاف مشکلات سے دوچار تھی کہ محمد رضوان نے اسدشفیق کے ساتھ رنز بنانا شروع کیے، 37 کے انفرادی اسکور پر ٹم پین نے پیٹ کمنز کی گیند پر رضوان کا کیچ لیا لیکن یہ نو بال تھی۔
امپائر نے کئی بار ری پلے دیکھا پھر بھی غلط آؤٹ دے دیا، امپائر کے فیصلے پر کمنٹیٹر ، کھلاڑی اور تماشائی سب حیران تھے اور غلط فیصلے کے خلاف سوشل میڈیا پر تنقید کی جارہی ہے۔
بیٹنگ کے دوران آسٹریلوی کپتان اور وکٹ کیپر ٹِم پین بھی محمد رضوان کو تنگ کرنے کے لیے ان سے باتیں کرتے رہے اور انہیں قومی ٹیم کے سابق کپتان سرفراز احمدکے شاٹس یاد دلاتے رہے۔
اس دوران آسٹریلوی ٹیم کے کپتان کی جملے بازی کو اسٹمپ پر لگے مائیکروفون نے ریکارڈ کرلیا، جس میں واضح طور پر سنا جاسکتا ہے کہ اسپنر نیتھن لیون کی بولنگ کے دوران ٹِم پین بظاہر قریب کھڑے مارنس لبوشین سے کہ رہے ہیں کہ 'اگر سرفراز ہوتا تو اس بال پر سوئپ شاٹ کھیل کر چوکا مارچکا ہوتا'۔
واضح رہے کہ قومی ٹیم آسٹریلیا کے خلاف پہلے ٹیسٹ کی پہلی اننگز میں 240 رنز بناکر آل آؤٹ ہو گئی ہے، وکٹ کیپر بلے باز محمد رضوان 3 سال بعد ٹیسٹ میچ کھیل رہے ہیں اور انہیں سابق کپتان سرفراز احمد کی جگہ ٹیم میں شامل کیا گیا ہے۔
مزید خبریں :
ٹی ٹوئنٹی ورلڈکپ 2009 کی فاتح ٹیم کی جیت کا سفر جاری
10 گھنٹے پہلے
