19 ستمبر ، 2021
نیوزی لینڈ کی جانب سے دورہ پاکستان منسوخ ہونے کے بعد قومی ٹیم کے سابق کپتان وسیم اکرم کا ایک اور بیان سامنے آ گیا ہے۔
نیوزی لینڈ نے 17 ستمبر کو پاکستان کے خلاف پہلے میچ سے قبل سکیورٹی وجوہات کو جواز بنا کر دورہ منسوخ کر دیا تھا۔
کرکٹ حلقوں کی جانب سے جہاں نیوزی لینڈ کرکٹ بورڈ کے فیصلے پر حیرانی کا اظہار کیا گیا وہیں قومی کرکٹرز کی جانب سے اس فیصلے کو پاکستان کرکٹ کے لیے بڑا دھچکا بھی قرار دیا گیا۔
اب اس حوالے سے قومی ٹیم کے سابق کپتان وسیم اکرم کا تازہ بیان سامنے آیا ہے۔
وسیم اکرم کا کہنا ہے کہ کرکٹ ہمارے لیے کھیل سے بڑھ کر ہے، پوری طاقت سے ایک بار پھر کرکٹ کو چھن جانے سے روکیں گے۔
سابق کپتان قومی ٹیم کا کہنا ہے کہ دنیا کو ہمیں ایک موقع دینا چاہیے، دنیا ہماری سکیورٹی فورسز کی طاقت کا غلط اندازہ لگاتی ہے۔
دوسری جانب سابق بھارتی ٹیسٹ کرکٹر مرلی کارتک نے بھی پاک نیوزی لینڈ کرکٹ سیریز منسوخ ہونے پر افسوس کا اظہار کیا ہے۔
مرلی کارتک کا کہنا ہے کہ پاک نیوزی لینڈ سیریز منسوخ ہونا بدقسمتی ہے، ہمیں پاکستان کا دورہ کرنا بہت پسند تھا۔
سابق بھارتی کرکٹر نے کہا کہ پاک نیوزی لینڈ سیریز منسوخ ہونے کے بعد چیزیں جلد بدل جائیں گی۔