29 دسمبر ، 2021 
پاکستان
ماضی میں پاکستان تحریک انصاف نے منصوبے پر 50 ارب روپے سے زائد لاگت کا الزام لگایا تھا— فوٹو:فائل
لاہور میٹرو بس کی لاگت سے متعلق پی ٹی آئی کا الزام غلط ثابت، رپورٹ پیش
29 دسمبر ، 2021
محکمہ ٹرانسپورٹ پنجاب نے پنجاب اسمبلی میں میٹرو بس لاہور کی تعمیرپرلاگت کی رپورٹ پیش کردی۔
محکمہ ٹرانسپورٹ نے بتایا کہ میٹروبس سروس منصوبے پر 29 ارب 61 کروڑ روپے لاگت آئی، حکومت پنجاب کیلئے میٹروبس سروس کا منصوبہ ایل ڈی اے نے تعمیرکیا۔
رپورٹ میں کہا گیا ہے کہ میٹرو بس سروس سے اوسطاً ایک لاکھ 37 ہزار مسافر روزانہ مستفید ہورہے ہیں جبکہ لاہور میٹروبس سروس کا یک طرفہ کرایہ فلیٹ ریٹ کی بنیاد پر 30 روپے ہے۔
رپورٹ کے مطابق لاہور میٹروبس سروس کا منصوبہ 2013 میں مکمل ہوا۔
خیال رہے کہ ماضی میں پاکستان تحریک انصاف نے منصوبے پر 50 ارب روپے سے زائد لاگت کا الزام لگایا تھا اور سیاسی مخالفین میٹرو بس لاہور کو جنگلہ بس بھی کہتے رہے ہیں۔
