25 اگست ، 2022 
سکیورٹی اداروں اور شخصیات کے خلاف سوشل میڈیا مہم، ایک ملزم کراچی سے گرفتار
25 اگست ، 2022
ملک کی قومی سلامتی کے اداروں اور شخصیات کے خلاف سوشل میڈیا پر ناپسندیدہ مہم چلانے کے معاملے میں ایک ملزم کو کراچی سے گرفتار کرلیا گیا ہے جس کے قبضے سے موبائل فون اور دو سمز بھی برآمد کی گئی ہیں۔
وفاقی تحقیقاتی ایجنسی ( ایف آئی اے) سائبر کرائم رپورٹنگ سینٹر کراچی کے ہاتھوں گرفتار ہونے والا ملزم جنید علی ضلع غربی کا رہائشی ہے، جس نے فیس بک اکاؤنٹ پر پوسٹ اپ لوڈ کی تھی۔
جنید علی کی پوسٹ بلوچستان ہیلی کاپٹر واقعے پر سکیورٹی ادارے اور اس کے سربراہ کے خلاف من گھڑت ہرزہ سرائی پر مبنی تھی۔
ملزم نے اپنی پوسٹ میں واقعے کی ذمہ داری ایک بیرونی ملک پر بھی عائد کی تھی۔ پوسٹ میں ملزم نے واقعے پر میڈیا کے کردار کو بھی مطعون قرار دیا تھا۔
سوشل میڈیا پوسٹ کیلئے استعمال کی گئی موبائل فون سم ملزم کی والدہ کے نام پر ہے۔ ملزم کو اس کے گھر سے گرفتار کیا گیا، پوسٹ کیلئے زیراستعمال موبائل فون برآمد کرلیا گیا جبکہ ناپسندیدہ مہم کیلئے استعمال کی جانے والی 2 موبائل نمبرز کی سم بھی ضبط کی گئی ہیں۔
