کھیل

بورڈ کو بابر سے پوچھنا چاہیے کہ کپتانی بیٹنگ میں رکاوٹ تو نہیں بن رہی؟ میانداد

03 اکتوبر ، 2022

بابر عالمی معیار کا بلے باز ہے لیکن کرکٹ بورڈ کو اس سے پوچھنا چاہیے کہ کہیں کپتانی بیٹنگ پر حاوی تو نہیں ہورہی؟ سابق کرکٹر/ فائل فوٹو

پاکستان کے لیجنڈری کرکٹر جاوید میانداد نے قومی کرکٹ ٹیم کے کپتان بابر اعظم کی کپتانی، بیٹنگ پرفارمنس میں حائل ہونے کا شبہ ظاہر کیا ہے۔

ایک حالیہ انٹرویو میں جاوید میانداد نے انگلینڈ کے خلاف 7 ٹی ٹوئنٹی میچز کی سیریز کے دوران کپتان بابر اعظم کی قیادت کی تعریف کی لیکن ساتھ ہی ان کا ماننا ہے کہ اگر کپتانی کے بوجھ کی وجہ سے پاکستانی اسٹار کی بیٹنگ متاثر ہورہی ہے تو اب وقت آگیا ہے کہ وہ اور پاکستان کرکٹ بورڈ بیٹھ کر بات کریں۔

انہوں نے کہا 'بابر عالمی معیار کا بلے باز ہے لیکن کرکٹ بورڈ کو اس سے پوچھنا چاہیے کہ کہیں کپتانی بیٹنگ پر حاوی تو نہیں ہورہی؟'

یہ بھی پڑھیں

جاوید میانداد کا کہنا تھا کہ 'اگر بابر کو لگتا ہے کہ وہ ٹیم کی قیادت اور اچھی بیٹنگ ایک ساتھ کر سکتا ہے تو وہ بھلے کپتان رہے، بورڈ کو اس بارے میں سنجیدگی سے بابر سے بات کرنے کی ضرورت ہے'۔

سابق کرکٹر نے انٹرویو میں کہا کہ 'کھلاڑیوں کو یہ سوچنے کی ضرورت ہے کہ انہیں سب سے پہلے پاکستان کے لیے کھیلنا ہے، جب وہ یہ سوچیں گے تو خود بخود اضافی کارکردگی دکھانے کی کوشش کریں گے، پھر چاہے فیلڈنگ ہو، بیٹنگ ہو یا بولنگ ہو'۔

جاوید میانداد نے یہ بھی کہا کہ 'کرکٹرز کو اس بات کو ذہن میں رکھنا چاہیے کہ وہ اچھے کھلاڑی ہیں تبھی پلیئنگ الیون کا حصہ ہیں، بھلے ان پر سوالات اٹھیں، انہیں فرق نہیں پڑنا چاہیے'۔

خیال رہے کہ انگلینڈ اور پاکستان کے درمیان ہونے والی 7 میچز پر مشتمل ٹی ٹوئنٹی سیریز کے آخری اور فیصلہ کن میچ میں انگلینڈ نے پاکستان کو باآسانی 67 رنز سے شکست دے کر سیریز 3-4 سے اپنے نام کرلی۔