11 جنوری ، 2023 
کراچی: سرجانی میں گھر میں ڈکیتی، مزاحمت پر ایک شخص قتل
11 جنوری ، 2023
کراچی: سرجانی ٹاؤن میں ایک گھر میں ڈکیتی کے دوران مزاحمت پر ملزمان کی فائرنگ سے شہری جاں بحق ہوگیا۔
پولیس کے مطابق واقعہ سرجانی ٹاؤن کے یارو گوٹھ میں پیش آیا جہاں تین ملزمان سلمان کے گھر میں چوری کی نیت سے داخل ہوئے تھے، واردات کے دوران گھر کے افراد جاگ گئے تو انہوں نے مزاحمت کی جس پر ملزمان نے فائرنگ کردی جس سے شہری سلمان جاں بحق ہوگیا۔
پولیس کے مطابق ملزمان گھر سے موبائل فون اور دیگر قیمتی سامان لوٹ کر فرار ہوگئے، جائے وقوعہ سے پستول کے دو خول ملے ہیں جنہیں فرانزک کے لیے لیب بھیج دیا گیا یے۔
دوسری جانب کراچی کے علاقے نیو کراچی میں ڈکیتی مزاحمت پر ایک اور شہری کو قتل کردیا گیا جس سے شہر بھر میں 11 روزکے دوران ڈکیتی مزاحمت پر 6 افراد جاں بحق ہوئے۔
ادھر گلشن اقبال بلاک 13 ڈی میں مبینہ ڈاکوؤں نے کمیٹی جمع کرنیوالی خاتون کا گھر لوٹ لیا جب کہ اسکیم 33 میں گاڑی بیچ کرگھر واپس آنے والے شہری کو نقدی سے محروم کردیا گیا۔
