12 جنوری ، 2023 
کراچی: رانگ سائیڈ سے آنیوالے پولیس ٹرک کی موٹرسائیکل کو ٹکر، خاتون جاں بحق
12 جنوری ، 2023
کراچی: نیشنل ہائی وے پر ملیر ہالٹ کے قریب پولیس ہیڈکوارٹر ایسٹ کے ٹرک کی ٹکر سے موٹر سائیکل پر سوار خاتون جاں بحق ہوگئیں۔
پولیس کے مطابق حادثہ نیشنل ہائی وے پر ملیر ہالٹ فلائی اوور کے نیچے پیش آیا۔
اس حوالے سے ملیر کے رہائشی محکم الدین نے جناح اسپتال میں بات کرتے ہوئے بتایا کہ وہ نیشنل ہائی وے پر اپنی اہلیہ کے ہمراہ موٹر سائیکل پر جا رہا تھا کہ رانگ سائیڈ سے ون وے آتے ہوئے پولیس ہیڈ کوارٹر ایسٹ کے ٹرک نمبر ایس پی ایف 810 نے انہیں ٹکر ماری۔
پولیس کے مطابق حادثے میں محکم الدین کی 66 سالہ اہلیہ دولت خان نیچے گریں تو ٹرک نے انہیں بری طرح کچل دیا جس کے نتیجے میں وہ موقع پر ہی جاں بحق ہو گئیں۔
محکم الدین کے مطابق ٹرک ڈرائیور حادثے کے بعد موقع سے فرار ہو گیا جب کہ پولیس نے ٹرک کو قبضے میں لے لیا اور خاتون کی لاش جناح اسپتال منتقل کر دی گئی۔
ایس ایس پی کورنگی کا کہنا تھا کہ قانونی کارروائی کیلئے فیملی سے رابطے میں ہیں فی الحال فیملی نے قانونی کارروائی سے منع کیا ہے۔
