05 فروری ، 2023 
اے پی سی کی دعوت دینی ہے تو لکھ کر دیں، فون پر دعوت دینا کوئی طریقہ نہیں: پرویز خٹک
05 فروری ، 2023
پاکستان تحریک انصاف (پی ٹی آئی) کے رہنما پرویز خٹک کا کہنا ہے کہ حکومت کو آل پارٹیز کانفرنس (اے پی سی) میں شرکت کی دعوت دینی ہے تو وہ لکھ کر دعوت دیں، فون پر دعوت دینا کوئی طریقہ نہیں ہے، حکمران پالیسی دیں کہ ملک دلدل سے کیسے نکلے گا۔
زمان پارک لاہور میں میڈیا سے گفتگو کے دوران پرویز خٹک کا کہنا تھا کہ اسٹیبلشمنٹ نیوٹرل رہنے کوشش کر رہی ہے لیکن حکومت نہیں چاہتی کہ ایسا ہو۔
انہوں نے کہا کہ حکومت الیکشن کی تاریخ پر بات کرے تو اس کے ساتھ بیٹھنے کو تیار ہیں لیکن حکومت سنجیدہ نہیں ہے۔
پرویز خٹک نے کہا کہ پی ٹی آئی حکومت نے ان کو جیل میں نہیں ڈالا تھا، یہ اپنے کرتوتوں کی وجہ سے جیل گئے تھے۔
خیبرپختونخوا (کے پی) میں فارنزک لیبارٹری کی عدم موجودگی کے حوالے سے بات کرتے ہوئے ان کا کہنا تھا کہ کے پی میں فارنزک لیبارٹری موجود ہے۔
