02 اگست ، 2023 
عشنا بلی جین کنگ کپ کمٹمنٹ ایوارڈ جیتنے والی پاکستان کی پہلی خاتون کھلاڑی بن گئیں
02 اگست ، 2023
پاکستان ٹینس اسٹار عشنا سہیل بلی جین کنگ کپ کمٹمنٹ ایوارڈ جیتنے والی پاکستان کی پہلی خاتون کھلاڑی بن گئیں۔
پاکستان ویمن ٹینس ٹیم نے ملائیشیا میں ہونے و الے بلی جین کنگ کپ میں شرکت کی اور اس موقع پر پاکستان ٹینس اسٹار عشنا سہیل بلی جین کنگ کپ کمٹمنٹ ایوارڈ حاصل کرنے میں کامیاب ہوئیں اور انہیں کوالالمپور میں آئی ٹی ایف نے کمٹمنٹ ایوارڈ سے نوازا۔
عشنا سہیل کو 16 سال پاکستان کی نمائندگی کرنے اور اپنے ملک کے لیے سب سے زیادہ سنگلز اور ڈبلز مقابلے جیتنے پر بلی جین کنگ کپ کمٹمنٹ ایوارڈ ملا، ایوارڈ کے موقع پر عشنا سہیل کے والدین بھی تقریب میں موجود تھے۔
عشنا سہیل کا کہنا ہے کہ یہ میرے لیے بڑے اعزاز کی بات ہے اور میں یہ ایوارڈ ملنے پر بہت پرجوش ہوں کیونکہ یہ ایوارڈ حاصل کرنے والی میں پاکستان کی پہلی خاتون کھلاڑی ہوں، بین الاقوامی سطح پر مجھے سراہا گیا ہے اور میں پاکستان کے لیے مزید اعزازات حاصل کرنا چاہتی ہوں۔
