بابر نے خود کپتانی نہیں مانگی، دوبارہ کپتان بورڈ نے بنایا: امام الحق

قومی کرکٹر امام الحق نے کہا ہے کہ بابر اعظم نے خود کپتانی نہیں مانگی بلکہ انہیں دوبارہ کپتان بورڈ نے بنایا۔

امام الحق، احمد شہزاد اور عمران نذیر کے ہمراہ جیو نیوز کے پروگرام ہنسنا منع ہے میں شریک ہوئے جس دوران میزبان تابش ہاشمی نے ان سے سوال کیا کہ ہم نےدنیا بھر میں کرکٹ دیکھی، کئی کپتان دیکھے لیکن کیا ایسا ممکن ہے کہ کوئی ایک انفرادی شخص یا دو چار لوگ اتنے پاورفل ہوجائیں کہ ان کے سامنے عوام، چیئرمین پی سی بی، کوچ سلیکشن بورڈ بے بس ہوجائیں؟

اس پر امام الحق نے جواب دیا کہ سب سے پہلی بات یہ ہے کہ بابر اعظم کو بابر اعظم کسی نے نہیں اسی عوام نے بنایا ہے، دوسری بات  بابر کا ایک بہت بڑا کیرئیر ہے،اور یہ ٹیم بابر کی نہیں، اگرچہ ایسا لگ رہا ہے کہ یہ بابر کی ٹیم ہے لیکن یہ بابر کی ٹیم نہیں ہے۔

انہوں نے کہا کہ بابراعظم کوجب کپتانی سے ہٹایا  گیا وہ رضامند نہیں تھے لیکن اس کے باوجود انہیں ہٹایا گیا،انہیں واپس لے کر آئے تب بھی بابر کی مرضی نہیں تھی، یہ بورڈ کا فیصلہ تھا ، بابر نے نہیں کہا کہ لاؤ میری  مجھے کپتانی واپس دیں۔

ٹیم کی پرفارمنس پر گفتگو کرتے ہوئے امام الحق کا کہنا تھاکہ ہم نے ماضی میں پرفارمنس دے کر فائنل اور سیمی فائنل تک رسائی حاصل کی، ایسا نہیں تھا کہ  پرفارمنس نہیں تھی  لیکن فائنل کیوں نہیں جیت پائے یہ الگ موضوع بن سکتا ہے، دنیا بھر کی ٹیموں کی پرفارمنس تسلسل سے آتی ہے۔

ٹیم سلیکشن اور دوستی یاری کی ٹیم کہنے سے متعلق کرکٹر نے کہا کہ ہم سب کو مکی آرتھر لے کر آئے تھے، بابر کو 2019میں ٹی ٹوئنٹی کا کپتان بنایا گیا تھا اس کے بعد  2021 میں تینوں فارمیٹ کا کپتان بنایا گیا، یہ لڑکے وہی ہیں اس ٹیم کو  بابر کی دوستی یاری کی ٹیم کہا جاتا ہے جوکہ غلط ہے، یوں کہا جاسکتا ہے کہ بابر کو یہ لڑکا پسند ہے لیکن اس سب میں ٹیم کو دوستی یاری کی ٹیم کہنا بہت ہی زیادہ ذاتی ہے۔