کھیل

میڈل وہی جیتے گا جو دباؤ برادشت کریگا: جیولین تھرور محمد یاسر

08 اگست ، 2024

میڈل وہی جیتے گا جو دباؤ برادشت کریگا: جیولین تھرور محمد یاسر — ارشد ندیم بڑے اعتماد اور ردہم میں دکھائی دے رہے ہیں، کوالیفائنگ راؤنڈ میں 86 میٹر سے زائد پہلی تھرو کرنا ان کے اعتماد کا ثبوت ہے: جیونیوز سے گفتگو/ اسکرین گریب

پاکستان نمبر ٹو جیولین تھرور محمد یاسر کا کہنا ہے کہ اولمپک میڈل وہی جیتے گا جو دباؤ برادشت کرے گا۔

ایشین تھروئنگ چیمپئن شپ کے سلور میڈلسٹ محمد یاسر نے جیو نیوز سے گفتگو کرتے ہو ئے کہا کہ ارشد ندیم بڑے اعتماد اور ردہم میں دکھائی دے رہے ہیں، کوالیفائنگ راؤنڈ میں 86 میٹر سے زائد پہلی تھرو کرنا ان کے اعتماد کا ثبوت ہے کیونکہ اس سے پہلے ان کی پہلی تھرو اتنی نہیں ہوتی تھی۔

یہ بھی پڑھیں

محمد یاسر نے کہا کہ فائنل میں مقابلہ سخت ہوگا، ٹاپ جیولین تھرور میدان میں ہیں، نیرج چوپڑا اور دیگر جیولین تھرور بھی فارم میں ہیں ان کی تھروز بھی بہت اچھی رہی ہیں۔

سلور میڈلسٹ کا کہنا تھا کہ اولمپکس کے لیے ارشد ندیم نے بھرپور ٹریننگ کی ہے، امید ہے پرسنل بیسٹ کرکے گولڈ میڈل لائیں گے لیکن اس کے لیے دیکھنا یہ ہو گا کہ ارشد ندیم پریشر کیسے برداشت کرتے ہیں۔

انہوں نے مزید کہا کہ فائنل کا اپنا پریشر ہوتا ہے اس لیے جو فائنل کا پریشر برداشت کرے گا وہی کامیاب ہو گا، ارشد کو تگڑے مائنڈ کے ساتھ میدان میں اترنا ہوگا۔

محمد یاسر کا کہنا تھاکہ کئی دہائیوں سے اولمپک میڈل نہیں آیا، اب پاکستان کے لیے ارشد ندیم اولمپک میڈل جیت سکتے ہیں، میڈل آنے سے ایتھلیٹکس کو مزید فروغ ملے گا اور نئے کھلاڑی سامنے آئیں گے ۔

واضح رہے کہ پیرس اولمپکس میں جیولین تھرو کا فائنل آج ہوگا جس میں پاکستان کے ارشد ندیم سمیت 12 ایتھلیٹس ایکشن میں ہوں گے۔