اننت امبانی کی شادی میں بالی وڈ اسٹارز کو بھاری رقم دینے کی خبروں پر اننیا پانڈے نے سچ بتادیا

بالی وڈ اداکار چنکی پانڈے کی بیٹی اننیا پانڈے نے بھارت کے امیر ترین تاجر مکیش امبانی کے چھوٹے بیٹے اننت امبانی کی شادی میں شرکت سے متعلق بالی وڈ اسٹارز کو ملنے والے پیسوں کے بارے میں انکشاف کیا ہے۔

حال ہی میں اننیا نے انٹرویو کے دوران اس بات کا انکشاف کیا، جب ان سے سوال پوچھا گیا کہ کیا  ان افواہوں میں کوئی صداقت ہے کہ اننت امبانی اور رادھیکا مرچنٹ کی شادی میں شرکت کے لیے بالی وڈ اسٹارز کو معاوضہ دیا گیا تھا؟

جواب میں اداکارہ نے کہا مجھے نہیں معلوم کہ لوگوں کو ایسا کیوں لگتا ہے کہ اگر ہم بالی وڈ اسٹارز نے اننت اور رادھیکا کی شادی پر ڈانس کیا تھا تو اس کے لیے ہمیں پیسے دیے گئے تھے۔

اننیا نے کہا اس بات میں کوئی صداقت نہیں ہے، یہ سب محض افواہیں اور جھوٹی بے بنیاد خبریں ہیں۔

اداکارہ نے مزید کہا کہ اننت اور رادھیکا میرے بہت اچھے دوست ہیں اور ظاہر سی بات ہے کہ میں اپنے دوستوں کی شادی پر ایسے ہی ڈانس کروں گی اور کیوں اس کے پیسے لوں گی؟

انہوں نے یہ بھی کہا کہ  اس شادی کی سب سے خاص بات یہ تھی کہ اننت اور رادھیکا بہت زیادہ خوش تھے، اس شادی کی بہت ساری تقریبات تھیں لیکن اس جوڑی نے بہت پیار اور محبت سے سب کا پرتپاک استقبال کیا، یہ ایسی شادی تھی جو مجھے کبھی نہیں بھول سکتی۔

یاد رہے کہ رواں برس کی شروعات میں شروع ہونے والی اننت امبانی اور رادھیکا مرچنٹ کی شادی کی تقریبات 14 جولائی تک ممبئی میں جاری رہی تھیں۔

ان تقریبات میں پورا بالی وڈ مدعو تھا، اس کے علاوہ اس میں ہالی وڈ اور بین الاقوامی شہرت یافتہ شخصیات نے بھی شرکت کی تھی۔