31 دسمبر ، 2024 
عاقب جاویدکی موجودگی میں اظہر محمود کی ٹیم منیجمنٹ میں جگہ نہیں بنتی: سکندر بخت
31 دسمبر ، 2024
سابق ٹیسٹ فاسٹ بولر سکندر بخت کا کہنا ہے کہ اظہر محمود کو بطور اسسٹنٹ کوچ قومی ٹیم کے ساتھ رکھنے کا معیار سمجھ سے باہر ہے۔
پاکستان کیلئے 1976 سے 1989 تک 26 ٹیسٹ اور 27 ون ڈے کھیلنے والے دائیں ہاتھ کے فاسٹ بولر سکندر بخت نے جیو نیوز کے پروگرام "اسکور" میں گفتگو کرتے ہوئے کہا کہ عاقب جاوید کے ہیڈ کوچ ہوتے ہوئے اظہر محمود کی ٹیم منیجمنٹ میں جگہ نہیں بنتی۔
سکندر بخت نے اظہر محمود کو شدید تنقید کا نشانہ بناتے ہوئےکہا کہ بنگلادیش کے دورہ پاکستان کے دوران اظہر محمود نے پریس کانفرنس میں کہا کہ ڈومیسٹک کرکٹ میں ہمارے پاس اسپنرز نہیں، پھر ہم نے دیکھا نعمان علی اور ساجد خان نے انگلینڈ کے خلاف ہمیں ٹیسٹ سیریز جتوا دی، اب محمد عباس جنہوں نے انگلش کاؤنٹی میں شاندار بولنگ کا مظاہرہ کیا، پھر قومی ٹیم میں شاندار کم بیک کیا، ایک بار اظہر محمود نے ان کا نام نہیں لیا حالانکہ وہ خود انگلینڈ میں رہتے ہیں۔
سکندر بخت نے مزید کہا کہ ایسے لوگ جن کی کھلاڑیوں کی کارکردگی پر ہی نگاہ نہیں، انہیں قومی ٹیم کے ساتھ نہیں ہونا چاہیے۔
