18 اکتوبر ، 2021 
عدالت نے مسابقتی کمیشن کو شوگر ملوں پر جرمانہ عائد کرنے سے روک دیا
18 اکتوبر ، 2021
لاہور ہائیکورٹ نے مسابقتی کمیشن کو شوگر ملوں پر جرمانہ عائد کرنے سے روک دیا۔
لاہور ہائیکورٹ کی جسٹس عائشہ اے ملک نے مختلف شوگر ملوں کی جانب سے دائر درخواستوں پر سماعت کی۔
درخواستوں میں مؤقف اختیار کیا گیا تھا کہ کمیشن نے غیر قانونی طور پر شوگر ملز ایسوسی ایشن کے ممبران پر اربوں روپے کے جرمانے عائد کیے، مسابقتی کمیشن کے 2 ممبران نے جرمانے کرنے اور 2 ممبران نے جرمانے نہ کرنے کا فیصلہ دیا، چیئرمین مسابقتی کمیشن نے غیر قانونی طور پر فیصلہ کن ووٹ دے کر درخواست گزاروں کو جرمانے کیے۔
درخواست گزاروں کا مؤقف تھا کہ چیئرمین مسابقتی کمیشن کو معاملے پر فیصلہ کن ووٹ دینے کا کوئی اختیار نہیں، کمیشن کے فیصلے کیخلاف مسابقتی ٹربیونل میں اپیلیں زیر التوا ہیں مگر ٹربیونل فعال نہیں ہے۔
درخواست گزاروں نے استدعا کی کہ شوگر ملوں سے جرمانوں کی ریکوری کا فیصلہ غیر آئینی و غیر قانونی قرار دے کر مسابقتی کمیشن کے حکم کو کالعدم قرار دیا جائے۔
لاہور ہائیکورٹ نے مسابقتی کمیشن کی جانب سے شوگر ملوں پر جرمانوں کا فیصلہ کالعدم قرار دیتے ہوئے کمیشن کو جرمانوں کی ریکوری سے بھی روک دیا اور وزارت قانون، مسابقتی کمیشن سمیت دیگر کو نوٹس جاری کر کے جواب طلب کر لیا۔
