سعود اور وسیم نے آخری لمحات میں اچھی بیٹنگ کر کے ہمیں پریشان کیا،کیوی بولر

نیوزی لینڈ کے لیگ اسپنر اش سودھی کا کہنا ہے کہ کراچی ٹیسٹ کے  آخری لمحات میں سعود شکیل اور وسیم جونیئر نے ہمیں پریشان کیا۔

کراچی میں کھیلا گیا پاکستان اور نیوزی لینڈ کے درمیان پہلا ٹیسٹ ڈرا ہوگیا۔

کراچی ٹیسٹ کے آخری روز پاکستان نے اپنی دوسری اننگز ڈکلیئر کردی جس کے بعد نیوزی لینڈ کو باقی 15 اوورز میں 138 رنز کا ہدف ملا تھا۔

دوسری اننگز میں پاکستان کی جانب سے امام الحق نے 96، سعود شکیل نے 55 اور وسیم جونیئر نے 43 رنز کی اننگز کھیلی، کیویز کے اش سودھی نے 6 کھلاڑیوں کو آؤٹ کیا۔

نیوزی لینڈ کے کھلاڑیوں نے تیز کھیل کر ہدف حاصل کرنے کی کوشش کی تاہم 8 ویں اوورز میں ایک وکٹ کے نقصان پر 61 کے مجموعی رنز پر کم روشنی کے باعث کھیل ختم کردیا گیا اور یوں دو ٹیسٹ میچز کی سیریز کا پہلا ٹیسٹ ڈرا ہوگیا۔

میچ کے بعد جیو نیوز سے گفتگو کرتے ہوئے کیوی اسپنر اش سودھی نے کہا کہ کافی عرصہ بعد ریڈ بال کرکٹ کھیل رہا تھا،  پہلی اننگز میں خود کو ایڈجسٹ کر رہا تھا۔

انہوں نے کہا کہ آخری لمحات میں سعود اور وسیم جونیئر نے ہمیں پریشان کیا،  میرے خیال میں وسیم  نے آکر کافی اچھی بیٹنگ کی۔

سودھی کا کہنا تھا کہ ہم پاکستان کو جلد آؤٹ کرسکتے تھےلیکن پھر  سعود اور وسیم نے  اچھی بیٹنگ کی اور ہم ٹیسٹ میں حاوی نہ ہوسکے۔

کیوی اسپنر نے کہا کہ پاکستان کے ڈکلیریشن نے مجھے حیران نہیں کیا تھا، اچھا فیصلہ تھا، اچھی بات ہے کہ ٹیمیں ٹیسٹ کرکٹ میں جارح ہو رہی ہیں۔

پاکستان اور نیوزی لینڈ کے درمیان پہلا ٹیسٹ ڈرا ہوگیا

کم روشنی کے باعث دونوں ٹیموں نے باہمی مشاورت سے میچ ختم کرنے فیصلہ کیا

اش سودھی کا کہنا تھا کہ ہم نے پاکستانی بولرز پر پریشر ڈالنے کی کوشش کی، اگر کچھ دیر اور سورج روشن رہتا تو ہمیں فائدہ ہوسکتا تھا، بدقسمتی تھی کہ اندھیرا تھوڑا جلد ہونے لگا تھا، معلوم نہیں کہ میچ ختم ہوتے وقت فیلڈ پر کیا بات ہوئی تھی۔

انہوں کہا کہ کوشش کریں گے کہ دوسرے ٹیسٹ میں بھی ہم اچھی کارکردگی دکھائیں۔