20 اپریل ، 2023
10 سال میں پہلی بار ہائبرڈ سورج گرہن کا مشاہدہ دنیا کے چند ممالک میں کیا گیا۔
ہائبرڈ سورج گرہن سے مراد ایسا گرہن ہوتا ہے جو نہ تو جزوی ہوتا ہے اور نہ ہی مکمل۔
یہ گرہن اس وقت ہوتا ہے جب چاند زمین سے اتنے فاصلے پر ہوتا ہے کہ یہ سورج کو پوری طور پر چھپا لے، لیکن جب یہ حرکت کرتا ہے تو یہ دنیا سے دور ہوتا جاتا ہے اور پورے سورج کو نہیں چھپا پاتا۔
یعنی زمین کے کچھ حصوں پر مکمل جبکہ دیگر میں جزوی سورج گرہن کا نظارہ ہوا۔
ایسے غیر معمولی ہائبرڈ سورج گرہن صدی میں چند بار ہی ہوتے ہیں، درحقیقت 2013 کے بعد پہلی بار اس طرح کے گرہن کا نظارہ ہوگا۔
مکمل سورج گرہن کا نظارہ آسٹریلیا کے مغربی ساحلی خطے میں کیا گیا۔
اس کے علاوہ جنوبی مشرقی ایشیا، بحر الکاہل، بحر ہند اور انٹار کٹیکا کے کچھ حصوں میں بھی جزوی سورج گرہن دیکھنے میں آیا۔
البتہ پاکستان میں سورج گرہن دیکھنے میں نہیں آیا۔
سورج گرہن کا آغاز پاکستانی وقت کے مطابق صبح 6 بجکر 34 منٹ پر ہوا، صبح 9 بج کر 17 منٹ پر سورج گرہن عروج پر تھا۔
ہائبرڈ سورج گرہن کا اختتام 11 بج کر 59 منٹ پر ہوا، سورج گرہن کے دوران ہی نئے چاند کی پیدائش کی پیشگوئی کی گئی تھی۔