02 اگست ، 2023 
بھارتی گولڈ میڈلسٹ کی ایشین ایتھلیٹکس میں میڈل جیتنے پر پاکستانی کھلاڑی کو مبارکباد
02 اگست ، 2023
پاکستان کے جیولین تھرور محمد یاسر نے حال ہی میں ایشین ایتھلیٹکس چیمپیئن شپ میں برانز میڈل جیتا جس پر بھارتی اولمپک گولڈ میڈلسٹ نیرج چوپڑا نے انہیں فون کر کے مبارکباد دی۔
جیو نیوز سے گفتگو کرتے ہو ئے محمد یاسر نے بتایا کہ نیرج چوپڑا میرے فیورٹ اور دوست بھی ہیں، انہوں نے میڈل جیتنے پر مجھے فون کیا اور مبارک دی، نیرج چوپڑا کے فون کرنے سے میری حوصلہ افزائی ہوئی اور میں مزید متحرک ہوا۔
محمد یاسر نے کہا کہ ایشین چیمپئن شپ میں مجھے موقع ملا اور میں نے اس کا فائدہ اٹھایا، اب میں کہہ سکتا ہوں کہ میرے کھیل میں بہتری آئی ہے، ارشد ندیم کی کمی محسوس نہیں ہونے دی اور اب میں ایشین گیمز کے لیے محنت کر رہا ہوں، اولمپکس کے لیے کوالیفائی کرنا چاہتا ہوں۔
پاکستانی ایتھلیٹ کا کہنا تھا ہمارے اور بھارتی جیولین تھرورز میں ٹریننگ کا فرق ہے، بھارت کے کھلاڑی بیرون ملک ٹریننگ کرتے ہیں جبکہ ہمارے پاس انٹرنیشنل معیار کے جیولین نہیں ہیں اور نہ ہی ہمارے پاس ٹریننگ کی سہولیات ہیں۔
