07 اکتوبر ، 2024
اسرائیلی حکومت نے حزب اللہ کے متوقع سربراہ ہاشم صفی الدین کی ہلاکت کی تصدیق کرنے سے انکار کردیا۔
غیر ملکی خبررساں ایجنسی کے مطابق اسرائیلی حکومت کے ترجمان کی جانب سے کہا گیا ہے کہ ہمارے پاس ہاشم صفی الدین کی ہلاکت کی مصدقہ اطلاع نہیں ہے، جب اس حوالے سے مصدقہ معلومات ملیں گی تو اسرائیلی فوج کی ویب سائٹ پر اطلاع دے دی جائے گی۔
خیال رہے کہ اسرائیل نے جمعرات کو لبنان کے دارالحکومت بیروت میں فضائی بمباری میں حزب اللہ کے شہید سربراہ حسن نصر اللہ کے متوقع جانشین ہاشم صفی الدین کو نشانہ بنانے کا دعویٰ کیا تھا۔
حزب اللہ ذرائع کی جانب سے بھی غیر ملکی خبررساں ایجنسی کو بتایا گیا کہ جس علاقے میں ہاشم صفی الدین کی موجودگی کا امکان ہے وہاں مسلسل اسرائیلی بمباری کے باعث ریسکیو آپریشن میں رکاوٹ آرہی ہے۔
اس سے قبل لبنانی سکیورٹی ذرائع کی جانب سے کہا گیا تھا کہ اسرائیلی حملے کے بعد جمعے کے روز ہاشم صفی الدین سے کوئی رابطہ نہیں ہوا۔