دلچسپ و عجیب

آکسفورڈ پریس نے برین روٹ کو 2024 کا لفظ قرار دیدیا

02 دسمبر ، 2024

آکسفورڈ پریس نے برین روٹ کو 2024 کا لفظ قرار دیدیا — یہ لفظ کسی فرد کی ذہنی حالت میں تنزلی کے اظہار کے لیے استعمال کیا جاتا ہے / فائل فوٹو

ہر سال آکسفورڈ یونیورسٹی پریس کی جانب سے ایک ایسے لفظ کا انتخاب کیا جاتا ہے جو گزشتہ 12 ماہ کی عکاسی کرتا ہے یا وہ طویل المعیاد ثقافتی اہمیت کا حامل ہوتا ہے۔

مگر 2024 کے لیے جس لفظ کا انتخاب کیا گیا ہے وہ بہت دلچسپ ہے۔

یہ لفظ ہے برین روٹ (Brain rot)۔

آکسفورڈ یونیورسٹی پریس کی جانب سے جاری بیان کے مطابق 37 ہزار سے زائد افراد کے ووٹوں کو مدنظر رکھ کر اس لفظ کا انتخاب کیا گیا۔

آکسفورڈ پریس نے 6 الفاظ کو شارٹ لسٹ کیا تھا جس میں سے برین روٹ کا انتخاب کیا گیا۔

برین روٹ بنیادی طور پر کسی فرد کی ذہنی یا دانشورانہ حالت میں تنزلی کو بیان کرنے کے لیے استعمال کیا جاتا ہے، خاص طور پر کسی مواد کو بہت زیادہ دیکھنے (جیسے آن لائن مواد) والے افراد کے لیے اس کا استعمال کیا جاتا ہے۔

آکسفورڈ پریس نے بتایا کہ اس اصطلاح نے 2024 میں کافی مقبولیت حاصل کی کیونکہ ایسے خدشات سامنے آرہے تھے جن میں کہا گیا تھا کہ آن لائن غیر معیاری مواد کو بہت زیادہ دیکھنے سے ذہنی حالت پر منفی اثرات مرتب ہو رہے ہیں۔

دلچسپ بات یہ ہے کہ یہ کوئی نیا لفظ نہیں بلکہ کمپیوٹرز کی آمد سے بھی پہلے کا ہے۔

یہ لفظ سب سے پہلے 1854 میں ایک کتاب Walden میں استعمال کیا گیا تھا۔

آکسفورڈ لینگوئجز کے صدر کیسپر گارتھ ہول نے بتایا کہ برین روٹ ورچوئل زندگی کے خطرات کی عکاسی کے لیے استعمال ہونے والا ایک لفظ ہے اور اس سے یہ علم ہوتا ہے کہ ہم اپنا فارغ وقت کیسے استعمال کر رہے ہیں۔

اس سے قبل آکسفورڈ پریس نے 2023 میں رِز، 2022 میں گوبلن موڈ جبکہ 2021 میں ویکس کو منتخب کیا تھا۔