28 دسمبر ، 2024 
سابق وزیراعظم من موہن سنگھ کا انتقال، سلمان خان کی فلم 'سکندر' کا ٹیزر ملتوی
28 دسمبر ، 2024
بالی وڈ کے سپر اسٹار سلمان خان کی اگلی ایکشن فلم سکندر کا ٹیزر لانچ ملتوی کردیا گیا۔
بھارتی میڈیا کے مطابق جمعہ کو سلمان خان کی 59ویں سالگرہ کے موقع پر ان کی نئی ایکشن فلم 'سکندر' کا ٹیزر ریلیز کیا جانا تھا۔
تاہم جمعہ کی صبح یہ اعلان کیا گیا کہ سابق بھارتی وزیراعظم من موہن سنگھ کے انتقال کی وجہ سے ٹیزر لانچ ملتوی کر دیا گیا ہے۔
فلم سکندر کے پروڈیوسرز نے جمعہ کی صبح اپنی آفیشل ایکس ہینڈل کے ذریعے بیان جاری کیا کہ ہمارے محترم سابق وزیراعظم من موہن سنگھ جی کے انتقال کی وجہ سے فلم'سکندر' کا ٹیزر ریلیز اب 28 دسمبر صبح 11:07 بجے تک ملتوی کر دیا گیا ہے۔
جمعرات کو سلمان خان کی سالگرہ سے ایک دن قبل فلم کے پروڈیوسرز نے شائقین کو اس وقت خوش کر دیا جب انہوں نے فلم سکندر میں سلمان کا لک والا پوسٹر جاری کیا۔
پوسٹر میں سلمان خان کو ایک سوٹ میں نیزا اٹھائے دکھایا گیا ہے، جس سے ان کی سخت اور دبنگ شخصیت کی جھلک ملتی ہے۔
فلم سکندر میں سلمان خان کے ساتھ اداکارہ راشمیکا مندانا اداکاری کرتی نظر آئیں گی ۔یہ فلم اگلے سال عید پر سنیما گھروں میں ریلیز کی جائے گی۔
واضح رہے کہ بھارت کے سابق وزیر اعظم من موہن سنگھ جمعرات کو 92 سال کی عمر میں انتقال کر گئے تھے۔
