20 فروری ، 2025 
'اتنا مہنگا ٹکٹ اور یہ حال'، عدنان صدیقی کراچی اسٹیڈیم سے مایوس، ویڈیو شیئر کردی
20 فروری ، 2025
معروف اداکار عدنان صدیقی نے پاکستان کرکٹ بورڈ کے چیمپئنز ٹرافی کے انتظامات پر ناراضی کا اظہار کیا ہے۔
گزشتہ روز چیمپئنز ٹرافی 2025 کا افتتاحی میچ پاکستان اور نیوزی لینڈ کے درمیان کراچی کے نیشنل اسٹیڈیم میں کھیلا گیا جہاں شہریوں کی بڑی تعداد میچ دیکھنے پہنچی جس میں معروف نام بھی شامل تھے۔
عدنان صدیقی کو بھی دیگر شائقین کرکٹ کی طرح مایوسی اور بد انتظامی کا سامنا کرنا پڑا۔
اداکار نے انسٹا گرام پر اسٹوری شیئر کرتے ہوئے مختصر ویڈیو شیئر کی اور انتظامیہ پر برہمی کا اظہار کیا۔
انہوں نے وی آئی پی انکلوژر سے شیئر کی گئی مختصر ویڈیو میں کہا کہ السلام علیکم دوستو! میں اسٹیڈیم آیا ہوں، اب آپ مجھے یہ بتائیں کہ اتنا مہنگا ٹکٹ لیں اور آنکھوں کے سامنے یہ (راڈ) ہو اور سامنے اتنا بڑا شیڈ ہو تو کیا نظر آئے گا؟
عدنان صدیقی نے تنقید کرتے ہوئے کہا کہ دوسری زبردست بات آپ کو بتاؤں؟ یہ اتنا دور دکھائی دے رہا ہے کہ ایسا لگ رہا ہے کہ میں دبئی میں بیٹھ کر میچ دیکھ رہا ہوں۔
خیال رہے کہ گزشتہ روز پاکستان اور نیوزی لینڈ کے درمیان چیمپئنز ٹرافی 2025 کا پہلا میچ کھیلا گیا جس میں نیوزی لینڈ نے دفاعی چیمپئن اور ایونٹ کی میزبان پاکستان ٹیم کو 60 رنز سے شکست دے دی۔
اسٹیڈیم میں موجود عدنان صدیقی سمیت دیگر شائقین بھی جہاں ٹیم کی خراب پرفارمنس پر مایوس دکھائی دیے وہیں اسٹیڈیم کی تعمیرِ نو کے باوجود ناقص انتظامات پر برہمی کا اظہار بھی کررہے ہیں۔
مزید خبریں :
اداکارہ کومل میر کی نئی ویڈیو پر ان کے چاہنے والے حیران
21 فروری ، 2025
